Link açıqlığı

Qırımda mahkeme «fevral 26 işini» bölmege teklif etti – Celâl


İyül 20-de 2014 senesi fevral 26 vaqiaları boyunca toplaşuv keçirilgen Rusiyege boysunğan Qırım Yuqarı mahkemesinde bu işni ekige bölmege teklif ettiler, dep bildire Qırımtatar Milliy Meclisi reisiniñ birinci muavini Nariman Celâl.

«Mahkeme işni bölmege teklif etti. Ahtem Çiygoz (iş boyunca qabaatlanğanlarnıñ biri – Meclis reisiniñ muavini – QA) ayrı, onı kütleviy nizamsızlıq teşkil etkeninde qabaatlaylar, ve qalğan beş oğlan ayrı, olarnı 26.02.14 kütleviy nizamsızlıqta iştirak etkenlerinde qabaatlaylar», – dep yazdı Celâl Facebook saifesinde.

«Prokuratura, er vaqıt olğanı kibi, mahkeme qararına qol tuttı, bütün adliyeciler böyle bölüvge qarşı çıqtı», – dedi o.

Ahtem Çiygoz
Ahtem Çiygoz

İyül 20-de, çarşenbe künü Aqmescitte «fevral 26 işi» boyunca diñlenüvler keçirile. Toplaşuv başında onıñ qapalı şekilde keçirilmesi aqqında qarar alındı.

Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahküm etmege başladılar.

«Memorial» uquq qoruyıcı merkezi Rusiyede «Fevral 26 işi» boyunca qabaatlanıp apiste bulunğan Ahtem Çiygoz, Ali Asanov ve Mustafa Degermencini siyasiy mabus olaraq tanıdı.

2016 senesi fevral ayında Rusiyege boysunğan Qırım Yuqarı mahkemesiniñ toplaşuvında bu işni qoşma taqiqatqa yollamaq qararı alındı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG