Link açıqlığı

Regional meclis ve «Avdet» gazetası Aqmescitte ofisten marum qaldı – Celâl


Aqmescit regional meclisi ve qırımtatar «Avdet» gazetası ofisten marum qaldı, dep bildire Qırımtatar Milliy Meclisi reisiniñ birinci muavini Nariman Celâl.

Onıñ malümatına binaen, çoq yıl devamında Aqmescit regional meclisi Çehova, 20 adresi boyunca yerleşken edi. 2014 senesi sentâbr ayında, Qırımtatar Milliy Meclisiniñ Merkeziy ofisi yaqalanğan soñ, aynı bu yerge «Avdet» muarririyeti de köçti, gazeta qayd etilüvden keçip olamadı ve adamlarnıñ desteginen 1000 hushası derc etile. Bunen beraber, Celâl bildirdi ki, aynı bu ofiste soñki eki yıl devamında Qırımtatar Milliy Meclisiniñ toplaşuvları, qırımtatar milliy areketiniñ veteranlarınıñ toplaşuvları ve diger merasimler keçirile edi.

«2016 senesi iyül 15-te, «Avdet» gazetasınıñ doğğan künü, Qırımtatar Milliy Meclisiniñ sabıq azası, şimdiki vaqıtta Aqmescit şeer memuriyetiniñ reis muavini Teyfuk Ğafarov, ğaliba, işçilerniñ refaqatında, ofis qapusınıñ kelitini mahsus bozdı. Neticede gazeta hadimleri ve regional meclisiniñ azaları ofike kirip olmadı. Bundan soñ elit asıl da yañısına deñiştirildi», – dep yazdı Celâl Facebook saifesinde.

Onıñ qayd etkenine köre, soñki yarım yıl devamında bu, regional meclisni ve gazeta muarririyetini ofisten çıqarmaq ekinci ıntıluvdır.

«Bu areketlerniñ manası nedir: Qırımda soñki serbestlik adalarını yoq etmek tırışma ya da kimseniñ ticariy menfaatlarınıñ çezilmesi, ya da, bu ve bu, yañın vaqıtta bilecekmiz. Ve, belki, sabıq ve şimdilik ameldeki Meclis işdeşleriniñ rolü boyunca pazlnıñ eksik parçaları öz yerine turacaq», – dep yazdı Celâl.

«Bir şey qattı aytam, Meclis memurlarğa temenna etmek içün barmaz. Ofisimiz bütün Qırımdır!» – dep qayd etti o.

Bu mesele boyunca Rusiyege boysunğan Aqmescit akimiyetiniñ izaatları yoq.

Qırım Rusiye tarafından işğal etilgen soñ Qırımtatar Milliy Meclisi, Rusiyege boysunğan Aqmescit Merkeziy rayon mahkemesiniñ qararını ömürge keçirip, Aqmescit merkezindeki Vorovskogo soqağında yerleşken ofisini, o yerde «Qırım Fondu» hayriye teşkilâtı ve «Avdet» gazetasınıñ muarririyetinen beraber, terk etmege mecbur oldı. Bina müürlendi. 2014 senesi noyabr 18-de Kiyev rayon mahkemesi «Qırım Fondu» hayriye teşkilâtınıñ müdiri Riza Şevkiyevni memuriy dava boyunca 350 biñ ruble para cezasınen cezalandırmaq qararını çıqardı, fond 4,5 million ruble para cezasınen cezalandırıldı.

Milletlerara munasebetler ve sürgün etilgen vatandaşlar meseleleri boyunca Devlet komitetiniñ reisi Zaur Smirnov ilân etken edi ki, «Qırım Fondu» hayriye teşkilâtınıñ mülkiyeti Qırım musulmanları diniy idaresine teslim etilmek kerek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG