Tünevin geceden berli internette bütün haber boşluğını qaplap alğan Türkiye ekspertleri sırasına kirmeyim, amma Ankara ve İstanbuldaki qırımtatar dernekleriniñ faallerinen ara-sıra bağlanam.
Qırımtatar asıllı olğan Türkiye vatandaşları türk cemaatınıñ ayırılmaz parçası olıp, siyasiy baqışları aynı olmağanını köstere ve yalıñız bir firqanıñ tarafdarı degiller.
Añlağanıma köre, Türkiyedeki qırımtatarlar memleketniñ iç ve tış siyaseti meselelerinde farqlı tüşüneler, bu baqışları umumen cemaattaki baqışlardan çoq («eki ukrain olğan yerde – üç getman» belli ata sözü mında da qullanıla bile).
Faqat Skype vastasınen kerçekleştirgen dialoglarım sırasında Türkiyede askeriy darbe vastasınen «demokratiya küçlendirilmesiniñ» tarafdarlarını tapmaq ıntıluvlarım neticesiz oldı.
Tünevin Türkiyede yüz bergen adise-vaqialar kösterdi ki, türk cemaatı akimiyetni küçnen deñiştirilmesine qarşı çıqa
Birisi begense-begenmese de, tünevin Türkiyede yüz bergen adise-vaqialar kösterdi ki, türk cemaatı akimiyetni küçnen deñiştirilmesine qarşı çıqa.
Soñki 12 yıl içinde eki Maydannı körgen (faal iştirakçisi ya da közeticisi olaraq) bizler, ukrainler, demokratiyanıñ temel qıymetleri ve öz devletiniñ dağılmasına yol bermemek arzuları şimdiki akimiyette yer alğan şahıslarğa iddiada bulunmaq istegini ekinci-üçünci yerge çeke bilecegine qolay-qolay razı olmamız.
«Bizler er angi darbege «yoq» demek içün soqaqlarğa töküldik. Bizler – asırlar boyu devletçilik ananeleri olğan bir halqmız ve olarnı küçnen basıp almalarına yol bermemiz» – subetdeşlerimniñ esas dellillerinden biri budır.
2013 senesi küzde – 2014 senesi qışta Yanukoviçniñ rejimi ukrain halqını onı devirmege mecbur etken müddet vaqtındaki Ukraina vaziyeti ile qıyaslanmasın dep, subetdeşlerim şunı qayd ettiler, Türkiyede tarihta qalğan sürekli devrimler vaqtında bile çetel kirişmesi Rusiyeniñ Ukrainağa qarşı yapqanlarına baqqanda, devlet (Türkiye) içün o qadar telükeli degil edi...
1923 senesi şekillengen zemaneviy Türkiye devletni saqlap qalmaq içün akimiyette olğan rejim devirilmek kerek kibi vaziyetke oğramağan edi
Adiy tilnen aytacaq olsaq, 1923 senesi şekillengen zemaneviy Türkiye devletni saqlap qalmaq içün akimiyette olğan rejim devirilmek kerek kibi vaziyetke oğramağan edi.
…Türkiyede yüz bergen soñki adise-vaqialarğa qıymet kesken adamlarnıñ fikirlerini deñiştirmek istemeyim. Olar (adiseler) daa bitmedi ve er birimiz yañı malümat alıp, öz baqışları esasında olarğa qıymet kese bilecek...
Menim içün eñ müimi şu ki, türk cemaatınıñ subyektleri ve qanunğa uyğun bir şekilde saylanğan akimiyet ne kibi dersler çıqaracaq.
Elbet de, demokratiya esaslarına, insan aqlarına sadıq qalğan ve Rusiye tarafından yañı qarşılıq teatrine çevirilgen Qara deñiz – Aq deñiz regionındaki NATOnıñ ileri nezaret noqtası olğan iqtisadiy ve siyasiy ceetten istiqrarlı bir Türkiye olmasını isteyim.
Eminim, mustaqil Türkiye medeniyetli qomşuları, şu cümleden Ukrainanıñ menfaatlarına riayet ete...
Refat Çubarov, Qırımtatar Milliy Meclisiniñ reisi
«Bloglar» rubrikasında bildirilgen fikir-tüşünceler müelliflerniñ noqtaiy-nazarlarını aydınlatıp, muarririyetniñ baqışları ile aynı olmaması mümkün