Link açıqlığı

Qırımtatarlar hırsızlanğan Ervin İbragimovnıñ evinde dua keçirdi


Hırsızlanğan Ervin İbragimovnıñ evi yanında keçirilgen dua, 2016 senesi, iyül 17

Hırsızlanğan Ervin İbragimovnıñ evi yanında iyül 17-de, onıñ doğğan künü, qırımtatarlar dua keçirdi. İbragimovnıñ azbarında 300-ge yaqın adam toplaştı. Bu aqta «Qırım mabusları» Facebook saifisinde bildireler.

Olıp keçkenini yaqında turğan rusiyeli uquq qoruyıcı organlarınıñ temsilcileri nezaret astında tuta edi. «Endi adet olaraq, «bizim» politsiyamız bizni saqlay», – dep qayd eteler beyanatta.

Bundan evel qırımtatar milliy lideri Mustafa Cemilev bu sene mayıs ayınıñ soñunda hırsızlanğan Ervin İbragimovnıñ doğğan kününde ümüt coymamaq ve onıñ qaytacağına ümüt beslemege çağırdı.

Ervin İbragimovnıñ hırsızlanması aqqında 2016 senesi mayıs 24-te haber peyda oldı. Rusiye Taqiqat komitetiniñ Qırım idaresi ğayıp olğan Qırım sakinini qıdırmağa başlağanını bildirgen edi.

Bağçasarayda hırsızlanğan Ervin İbragimovnıñ soy-sopları onıñ qaytarılması içün 1 million ruble bereceklerini ilân etti.

Rusiyege boysunğan işğal etilgen Qırımnıñ prokurorı Natalya Poklonskaya hırsızlanmanıñ üç ola bilecek sebebini ayttı: para almaq maqsadınen hırsızlav, İbragimovnıñ ticariy faaliyeti ve «Qırım uquq qoruyıcı organlarına iftira atmağa istep, Qırımdaki vaziyetni kerginleştirmek maqsadınen yapılğan hırsızlav».

Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG