Türkiye işbirlik ve koordinatsiya agentligi (TİKA) Ukrainağa devlet içinde, hususan Rusiye tarafından işğal etilgen Qırımdan köçken şahıslarğa destek köstermege yardım etmege planlaştıra. Bu aqta TİKA programmasınıñ temsilcileri ve Ukrainanıñ vaqtınca işğal etilgen territoriyalar ve devlet içinde köçken şahıslar meseleleri boyunca naziriniñ birinci muavini Yusuf Kürkçi keçirgen körüşüvde söz yürsetildi. Körüşüv iyül 14-te, cumaaqşamı künü keçirildi, dep bildire ukrain müessisesiniñ matbuat hızmeti Facebook saifesinde.
«Ukraina Türkiyeniñ strategik ortağı ola, bunıñ içün Qırım işğali sayesinde Ukrainanıñ qıtaiy qısmına köçken qırımtatarlarnen bağlı leyhalarğa qoşulmağa planlaştıramız. Hususan, Qırımdan eñ çoq köçkenler olğan şeerlerde oquv yurtlarına ve sağlıq saqlav müessiselerine kirişniñ teminlenmesi aqqında söz yürsetile», – dep bildire matbuat hızmeti Ukrainada TİKA programmasınıñ idarecisi Hacı Bayram Bolatnıñ sözlerini.
TİKA Qırımdan yekâne çıqqan aliy oquv yurtu olğan Vernadskiy adına Tavriya milliy universitetine yardım etmege söz berdi. Oquv ceryanınıñ teminlenmesi ve şarqiy tiller kafedrasınıñ teşkil etilmesi muzakere etildi. Bundan da ğayrı, beyanatta qayd etile ki, Türkiyeli teşkilât Şevçenko adına Milliy universitette qırımtatar tili kafedrasını teşkil etmege yardım etti.
Ukraina territoriyasında TİKA 1997 senesinden başlap Ukraina Nazirler kabineti ve Türkiye Cumhuriyeti ükümeti arasındaki mütenasip añlaşmalar çerçivesinde leyhalar ve programmalarnı ömürge keçire.
TİKA 1992 senesinden başlap halqara tehnikiy yardım saasında çalışa. Bu agentlikniñ temsilcilikleri dünyanıñ 100-den ziyade devletinde faaliyet alıp bara.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
