Link açıqlığı

Rusiyege boysunğan Qırım deputatları dünyanı Mecliske destek köstermemege çağıra – beyanat


Aqmescitteki Qırım parlamenti binası, arhiv fotoresimi

Rusiyege boysunğan Qırım parlamenti «Qırım ealine qarşı er angi ekstremizm ve terrorizm şekillerini» takbih etmege çağıra.

Bu aqta iyül 8-de qabul etilgen rusiyeli Qırım parlamentiniñ beyanatında bildirile, vesiqada deputatlar Qırımtatar Milliy Meclisiniñ telükeli olğanını qayd ete.

«Qırım Cumhuriyeti Devlet Şurası, muntazam ekstremist areketler, terroristik taqımlarınıñ faaliyeti artqanı ve «Qırımtatar Milliy Meclisi» dep adlandırılğan cemaat birligi ve onıñ tarafdarları tarafından teşkil etilgen terrorizmnen bağlı cinayetlerniñ sayısı artqanı munasebetinen qasevet çekkenini bildire», – dep aytıla beyanatta.

Vesiqada qırımtatar lideri Mustafa Cemilev ve Meclis reisi Refat Çubarovnıñ ukrain kütleviy haber vastalarında işğal etilgen Qırımnen bağlı bir sıra beyanatları bildirile. Deputatlar ticariy ve elektrik qamaçavını da hatırlattı, olar onıñ teşkil etilmesini Meclis azalarınen bağlay.

Bundan da ğayrı, rusiyeli Qırım parlamenti «siyasiy, iqtisadiy, içtimaiy, dinlerara, milletlerara ve diger meselelerniñ çezüv vastaları olaraq ekstremizm, terrorizm ve zorbalıqnı takbih etkenini ve Qırım Cumhuriyeti Yuqarı Mahkemesiniñ «Meclisni» ekstremistik teşkilâtı olaraq tanımaq ve onıñ faaliyetini yasaq etmek qararına qol tutqanını ilân etkeni aqqında bildirile.

«Qırım Cumhuriyeti Devlet Şurası dünya toplulığını Mecliske ve onıñ tarafından teşkil etilgen qanunsız silâlı teşkilâtlarğa iç maneviy, maliye, tehnikiy yardım köstermemege çağıra», – dep aytıla beyanatnıñ soñunda.

Meclis temsilcileriniñ bu beyanat boyunca izaatı daa yoq. Qırım.Aqiqat mütenasip izaatnı almağa tırışa.

Rusiyeli mahsus hızmetler qırımtatar halqınıñ lideri Mustafa Cemilevge 2014 senesi Qırımğa kirmege yasaq etken vesiqanı berdi, o vaqıt yarımada endi işğal etilgen edi. Aynı böyle Qırımğa kiriş 5 yılğa yasaq olğanını bildirgen vesiqa Qırımtatar Milliy Meclisi reisi Refat Çubarovğa berildi.

Aprel 26-da Rusiyege boysunğan Qırım Yuqarı mahkemesi Meclisniñ yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketini takbih etti.

Meclis imayesi Rusiye Yuqarı mahkemesine apellâtsiya şikâyetini yolladı, amma onıñ baqıluvı tarihı daa belgilenmedi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG