Link açıqlığı

Kiyevde Qırımnıñ Rusiye işğaline qarşılığı aqqında filmniñ premyerasını azırlaylar


Qırım, 2014 senesi, yeşil adamçıqlar

«Krım.Sprotiv» («Qırım.Qarşılıq») vesiqalı-bediiy filmniñ premyerası iyül 12-de, saat 17:30-da Kiyevdeki «Ukraina» kinoteatrinde keçirilecek. Film Ukraina haber siyaseti nazirliginiñ desteginen yapıldı, dep bildire Qırım.Aqiqat.

Fikir ve stsenariy müellifi, haber siyaseti naziriniñ birinci muavini Emine Ceppar ola. Baş rejissör – Fatima Osmanova.

Vesiqalı-bediiy film 2014 senesi fevral ayında Qırım Muhtar Cumhuriyetiniñ rusiyeli askerler tarafından işğal etilgeni aqqında añlata.

Filmniñ baş qaramanı, çoq milletli Qırımnıñ halqlarını ögrenmek içün yarımadağa kelgen ecnebiy tedqiqatçı Jeyms ola. Hususan bu yerde 2014 senesi fevral-mart ayları devamında o, «adsız» rusiyeli ordusınıñ peyda olması ve Qırımnıñ Ukraina terkibinden çıqması boyunca qanunsız referendumnıñ şaatı oldı. Alim, şaat olğan vaqialarnı terence ögrenmege tırışa. Eki yıldan soñ ise, Jeyms dünyağa Ukrainada o vaqıt neler olğanını añlatmağa qarar ala.

Film müellifleriniñ qayd etkenlerine köre, peşin fikirsiz alimniñ közünen körülgen işğal hronikaları seyircige Qırım işğaliniñ kerçek levhalarını ve onıñ yerli eali içün aqibetlerini körmege yardım ete.

Baş qaramannıñ fikrince, fevral 26, Ukraina topraq bütünliginiñ biñlerсe tarafdarı mitingge çıqqan, o vaqıt bugünki künde ameldeki Qırım yolbaşçısı Segey Aksönovnıñ yolbaşçılığındaki «Russkoye edinstvo» («Rus birligi») firqasınıñ faalleri olarğa qarşı çıqqan bir kün, zemaneviy Ukraina tarihına Qırımnıñ Rusiye işğaline qarşılığı künü olaraq kirecek.

Ukraina Nazirler kabineti prezident fermanı leyhasını alğışladı ve fevral 26 künü Qırım sakinleriniñ Rusiye basqıncılığına qarşılığı künü olaraq tasdıqladı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG