Herson vilâyetinde qırımtatar territorial muhtariyetiniñ teşkil etilmesi şimdilik kerçek ola bilecek şey degil, dep belley Kiyevdeki Pilip Orlik adına Demokratiya institutınıñ eksperti Natalya Belitser.
Bu aqta o, iyül 4-te Kiyevde keçirilgen matbuat konferentsiyasında ayttı, dep bildire Qırım.Aqiqat.
«Bu pek zıt bir meseledir. Teşviqat, bu cümleden rusiyeli teşviqat, Herson vilâyeti ealiniñ büyk bir qısmını bu fikirge qarşı qurdı. Bunıñ içün Herson vilâyetinde eksiksiz qırımtatar territorial muhtariyetiniñ qurması şimdiki vaqıtta ola bilecek leyha degildir», – dep qayd etti Belitser.
Amma, onıñ fikrince, böyle muhtariyetniñ bazı modellerini endi ömürge keçirmege başlamaq mümkündir. Meselâ, yerli meclislerniñ ve yerli öz-özüni idare etüv organlarınıñ işbirligi seviyesinde.
İyün 23-te Kiyevde debatlar keçirildi ve qırımtatar muhtariyeti aqqında efsaneler muzakere etildi. Toplaşqan ekspertler milliy muhtariyetniñ ne olğanını, ve tamır halqnıñ aq-uquqları saqlanması içün kerekli areketlerni añlattı.
Ukraina prezidenti Petro Poroşenko qırımtatar milliy-territorial muhtariyetiniñ teşkil etilmesi içün kerekli deñişmelerniñ Ukraina Anayasasına kirsetilmesi tez şekilde olması içün destek köstermege vade etti. 2015 senesi iyül ayında Petro Poroşenko Ukraina Anayasasına Qırımda qırımtatarlarnıñ milliy muhtariyeti aqqında qaidelerniñ kirsetilmesi kerek olğanını ilân etti. Bundan da ğayrı, o, halq deputatlarını devletniñ Anayasasına deñişmelerniñ kirsetilmesine qol tutmağa çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
