Avropada havfsızlıq ve işbirlik boyunca teşkilâtnıñ (OSCE) Parlament assambleyası komiteti Gurcistan paytahtı Tbiliside keçirilgen sessiyada Rusiye tarafından ukrain Qırımnıñ işğalini takbih etken rezolütsiyanı qabul etti.
Ukrain temsilcileri tarafından OSCE Parlament assambleyasınıñ baqıluvına kirsetilgen rezolütsiya «Qırımda insan aqları ve esas serbestliklerniñ bozuluvı, qırımtatar ealiniñ aqları bozulması aqqında» adını taşıy.
«OSCE Parlament assambleyası Rusiye Federatsiyasını Ukrainağa qarşı basqıncılıqnı toqtatmağa ve Birleşken Milletler Teşkilâtınıñ Nizamnamesinde, Helsinki netice aktında belgilengen vazifelerini, bunen beraber, diger halqara uquq qaide ve printsiplerini, OSCE çerçivesindeki printsip ve mecburiyetlerni bütünley becermege çağıra», – dep aytıla vesiqada.
Rezolütsiya leyhasında aza-devletleri, Qırım Muhtar Cumhuriyeti ve Aqyarnıñ Ukrainanıñ qısmı olaraq statusınıñ deñiştirilmesini tanığan er angi areket ve bağlardan uzaq turmağa çağırıla.
Vesiqada «de facto ükümetiniñ» tarafından Qırımtatar Milliy Meclisine ve onıñ yolbaşçılarına qarşı repressiyalar, barışıq toplaşuvlarınıñ, bu cümleden, qırımtatarlarnıñ sürgünligi yıllığına bağışlanğan ananeviy merasimlerniñ serbestligi sıñırlanması takbih etile.
Vesiqada qayd etilgenine köre, OSCE Parlament assambleyası işğal etilgen Qırımda kütleviy haber vastaları serbestliginiñ ve fikir bildirme serbestliginiñ qattı sıñırlanmasını takbih ete, bunen beraber, ukrain tilinde tasil alma imkânı yoq olunğanı munasebetinen qasevet çekkenini bildire.
Rezolütsiya leyhasında Rusiyeni «işğal etilgen Qırımda de facto ükümetiniñ tarafından yağılğan qabaatlav boyunca apislerge qapatılğan ya da qanunsız yaqalanğan» Qırım siyasiy mabuslarını «acele ve lafsız» qaytarmağa çağıralar.
Bundan evel Rusiye eyyeti rezolütsiya leyhasınıñ muzakere etilmesinde iştirak etmege red etti.
OSCE Parlament assambleyasınıñ sessiyası iyül 1-den 5-ke qadar Tbiliside keçirile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
