Link açıqlığı

QMDİ qırımtatar qasabası yanında haçnıñ tiklenilmesine qarşı narazılıq bildire


Bağçasaray rayonındaki Tav Badraq köyü yanında haç, Qırım

Qırım ve Sevastopol musulmanları diniy idaresi (QMDİ) Aqmescit kirişinde, qırımtatarlar toplu yaşağan qasaba yanında ibadet etilecek haçnıñ tiklenilmesine qarşı narazılıq bildire. Bu aqta malümat QMDİ beyanatında bildirile.

«Öz isteginen cemaat toplağan yerlerde diniy timsallerniñ tiklenilmesi narazılıqqa, bu cümleden Boğurça (Kamenka) qasabasınıñ musulman cemiyetiniñ narazılığına yol berdi, o QMDİ-ge muracaat etti», – dep aytıla beyanatta.

Bundan evel kazak cemiyetleriniñ teşebbüsi ile yarımadada onlarca ibadet etilecek haçlar tiklenildi. Farqlı yıllarda, 2000 senesinden başlap, bu, diger dinler temsilcileri tarafından narazılıqnıñ peyda olmasına sebep olğan.

Qırım Müftiyatında hatırlatqanlarına köre, vaziyetniñ eyileşmesi içün «Dünya Allahnıñ ediyesidir» dinlerara şurasında bu kibi areketlerniñ Qırımnıñ yetekçi konfessiyalarınıñ temsilcileri tarafından uyğunlaştırılmaq kerek olğanı aqqında qarar alındı.

«Qırım musulmanları diniy idaresi «Ukrain haç yıqmaları» teşebbüsleriniñ yañıdan peyda olmasından qasevet çeke, bu, Qırım müftisiniñ «Dünya Allahnıñ ediyesidir» dinlerara şurasınıñ terkibinden çıqmasınıñ, onıñ bu strukturada nominal şahıs olmağa red etkeniniñ sebebi oldı», – dep qayd etile beyanatta.

Rusiye tarafından işğal etilgen Qırımnıñ Muftiyatı ameldeki yarımada ükümetine ve Qırım diniy müessiselerine «nasıldır siyasiy quvetlerniñ» areketlerine obyektiv qıymet kesmege ve milletlerara ve dinlerara munasebetlerniñ kerginleşmesiniñ ögüni almağa çağırdı.

Ukrain Ortodoks Kilsesi (Moskva patriarhatı) Qırım yeparhiyasında bu vaziyetke izaat bermeyler.

2014 senesi avgust ayında, işğalden yarım yıl keçken soñ, haç Bağçasaray rayonındaki Tav Badraq (Skalistoye) köyünde yol kenarında peyda oldı, evel o yerde, qırımtatarlarnıñ fikrince, eski qırımtatar mezarlığı bar edi.

2015 senesi oktabr ayında eñ büyük, yüksekligi 7 metr, ağırlığı 6 tonna olğan haç Nikolayevka kirişinde qoyuldı. 2016 senesi aprel ayında ibadet etilecek haç Sudaqta, mayıs ayında ise, birden üç haç Aqmescitniñ Yalta tarafından kirişinde, Eski Orda (Lozovoye) ve Anğarada (Perevalnoye) tiklenildi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG