«Qırım birdemligi» birleşmesi üç ay çalışsa da, bu müddet içinde onıñ etrafında bir sıra yañı faal ve küç toplaştı.
İyün 25-te «Qırım birdemliginiñ» soñki toplaşuvında «Bizim balalar» leyhasınıñ faalleri ve onıñ koordinatorı Lilâ Bucurova qoşuldılar. Körüşüvge Poloniyanıñ «Fundatsiya Krım» vaqfınıñ reisi de keldi. Qırımtatar Milliy Meclisiniñ vekillerinden biri Zair Smedlâyev, İnsan aqları kontakt gruppasınıñ azaları Abdureşit Cepparov, Emil Kürbedinov ve Edem Semedlâyev de bar ediler.
Körüşüv keçirilgen yerge politsiya maşinaları da keldi, uquq qoruyıcılar ne kibi tedbir keçirilecegini soradılar. İnsan aqları kontakt gruppasınıñ koordinatorı, «Qırım birdemligini» qurmağa teşebbüs köstergenlerden biri olğan Abdureşit Cepparov apiske alınğanlarnıñ soy-sopları bir-birine maneviy olaraq qoltutmaq içün körüşkenini añlattı.
«Qırım birdemliginiñ» üçünci körüşüvi olıp keçti. Birincisi aprel 9-da, ekincisi mayıs 21-de, üçüncisi iyün 25-te oldı. Kelecek toplaşuvnıñ künü de belli. «Qırım birdemligi» oldı dememiz mümkün. Bugünde-bugün planlar qurıp, olarnı yerine ketiremiz. Apiste yatqan insanlarnıñ balaları ve qorantalarına kelgen ilk yardımlar bar. İşimizniñ belli bir neticesi ve hulâsası bar. Çetel fondları qoşula. Beklegenimizden bile çoq oldı. Mence, ileride de güzel bir inkişaf ve dinamik olacaq. Quvandıq», – dep izaatladı körüşüv neticelerini Abdureşit Cepparov.
Amma, yeñişlerge baqmadan, yañı qasevetler de peyda ola. Qırımnıñ siyasiy mabusları yatqan apishane odaları pek sıcaq. Apiske alınğan musulmanlarnıñ soy-sopları yaqın ayları tuvğanlarını körip olamaycaqlarından qorqa.
İyün 23-te «Hizb ut-Tahrir» işiniñ mabusları Emir-Üsein Kuku, Vadim Siruk, Müslim Aliyev ve Enver Bekirovnıñ apis cezasını uzatma qararı boyunca apellâtsion mahkemesi olıp keçti. Toplaşuv videokonferentsiya rejiminde keçirildi. Bu sebepten ne soy-soplarınen laf etmege, ne de bir mektüp yollamağa imkân olmadı. Apiste yatqanlarnıñ tuvğanları mahkemeler ileride de videokonferentsiya şeklinde keçirileceginden qorqalar.
Soy-sopları mahkemelerge kelip, apiste yatqanlarğa qoltutalar, bu sebepten de mahkemelerniñ videokonferentsiya şeklinde keçirilmesi qararı alındıDilâver Memetov
«Başta olarnı SİZOdan ketire ediler, bizler olarnı ya ayatta, ya da oturğan şu qafeslerde köre edik, sağlıqları nasıl, ne yaşaylar soramağa imkânımız ola edi. Şimdi Ramazan ayı, öyle de bir şey aşamaylar bütün kün, iç olmağanda iftarda et, meyva aşasınlar. Bunı bile sorap olamaymız. Videokonferentsiya formatında oldı. Olar bir odağa kirip, kamera qarşısında mahkeme ile subetleştiler», – dep ayta «Qırım birdemliginiñ» koordinatorlarından biri Dilâver Memetov.
Mahkemede söz alğan mahküm Vadim Siruk qayd etti ki, «iş tam bir tüşünceler esasında açıldı, amma taqiqatçılar qabaatı olmağan insanlarnı apiske alalar, saba saatlerinde evlerimizge betlerini qapatıp kireler, balalarnı, qadın ve qartlarnı qorquzalar...». Apishanedeki aşlar aqqında sualge şöyle bir cevap berdi: «Duşmanğa berilmeycek bir ragu».
Birleşmeniñ faali Anna Bogaçevanıñ qayd etkenine köre, apis şaraitlerine baqmadan, «Hizb ut-Tahrir» işiniñ mabusları imanları sayesinde mert qalalar.
Al-azırda Rusiye uquq qoruyıcıları tarafından «Hizb ut-Tahrir» ile alâqaları olğanınen qabaatlanğan 14 Qırım musulmanı apiste yata.
«Hizb ut-Tahrir» – halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti. Bu teşkilât Rusiye, Özbekistan, Qazahistan, Qıtay, Almaniya, Asiya ve Afrikanıñ bazı devletlerinde yasaq etildi. Ukraina ve Ğarp memleketleriniñ çoqusında onıñ faaliyeti qanun boyunca alıp barıla bile.
