Ukraina prezidentiniñ qırımtatar halqı işlerinden vekâletlisi Mustafa Cemilev Rusiyede Qırım işğalini tenqit etkeninden mahküm etilgen tatar faali, Tatar cemaat merkeziniñ reisi Rafis Kaşapovnıñ doğğan kününi tebrikledi.
«Putin rejiminiñ siyasiy mabusı Rafis Kaşapov ve egiz qardaşı Nafis Kaşapovnıñ 58 yaşı hayırlı olsun. Küç-quvet ve sağlıq tileymiz», – dep aytıla vekâletliniñ Facebooktaki saifesinde.
Mustafa Cemilev hatırlattı ki, Tatar cemaat merkeziniñ reisi Rafis Kaşapov qırımtatarlarğa qoltutıp, Qırım işğali ve Rusiyeniñ Donbass istilâsına qarşı çıqır, Rusiyede üç yılğa qadar apis etildi.
«Oña ve bütün Rusiye siyasiy mabuslarına yaqın zamanda azat etilmelerini tileymiz», – dep qoştı Cemilev.
Rafis Kaşapov mahkeme ükmünden Avropa insan aqları mahkemesine şikâyet etti. 2015 senesi sentâbr ayında Naberejnıye Çelnı şeerindeki mahkeme 57 yaşında Rafis Kaşapovnı Rusiyeniñ topraq bütünligini bozmağa çağırmaları ve internet üzerinden nefret doğurması ile qabaatladı. Qabaatqa köre, Kaşapov «VKontakte» içtimaiy ağındaki saifesinde «Ukraina ve bütün türk dünyasını qorçalayıq», «Rusiye olğan yerde közyaş ve ölüm», «Tünevin Gitler ve Dantsin, bugün Putin ve Donetsk» adlı maqalelerni derc etken edi. Mezkür maqalelerde Qırımnıñ Rusiyege qoşulmasına işğal denile, Rusiye akimiyeti ise qırımtatarlarğa basqı yapması ile qabaatlana. Kaşapov üç yılğa qadar apis etildi.
Faal qabaatını tanımadı. «Memorial» uquq qorçalayıcı merkezi Kaşapovnı siyasiy mabuslar cedveline qoştı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
