Link açıqlığı

Ukraina prezidenti Petro Poroşenkonıñ saytında iyün 30-da işğal etilgen Qırımğa ve Qırımdan turist kezintilerini yasaqlamağa çağırtqan petitsiyanı yerleştirdiler. Petitsiyanıñ müellifi Vasiliy Koval Ukraina şirketlerine Qırımğa turist kezintileriniñ teşkil etmeni yasaqlamağa, em de yarımadanıñ ziyaretine uyğun teşkerüvi ve Ukraina uquq qoruyıcılarınıñ ruhsetinen yaqın soy-soplarğa barmağa içün izin bermege teklif ete.

«Amerika Qoşma Ştatları ve Avropa Birligini örnek olaraq almaq ve öz vatandaşlarına (ve başqalarına) Qırımğa ve Qırımdan turist kezintilerini yasaqlamağa ve soy olğanını teşkergen soñ içki işler nazirliginde ruhset alıp, tek anda/mında yaqın soy-sopları olğanlarğa yarımadağa ve yarımadadan çıqmağa ruhset bermek», – dep aytıla petitsiyanıñ metninde.

Rejimniñ bozulması içün petitsiyanıñ müellifi «grajdanlarnı cedvelge almağa», soñra ise «sıñırnı er bir tarafqa keçmege yasaqlamaq» istey. «Ömürlik anda qalsınlar. Nezaret Çernobılde olğanı kibi olmalı», – dep aytıla petitsiyada.

Vesiqada Şimaliy Qıbrız tarafınıñ işğal örnekleri de ketirile, bundan soñ Qıbrız vatandaşlarına işğal etilgen yerlerni ziyaret etmege tahminen 30 yıl yasaq oldı.

Ukrainada Rusiye tarafından işğal etilgen Qırımğa taşımalarnı yasaqlamaq içün bayağı çağırtmalar eşitile. Ukrain jurnalisti Roman Skrıpin yaqında Facebookta yarımadağa yolcu taşımalarınen ilânnıñ fotoresimini yayınladı ve Ukraina telükesizlik hızmetini bu vaqiağa diqqatını celp etmege çağırdı.

Dnepr valisi Boris Filatov Qırımda raatlıqnıñ reklamalarını yasaqlamaq niyeti aqqında bildire edi. Şeerde «Turist separatizm – STOP» areketi işlemege başladı, onıñ iştirakçileri Qırımda raatlıq reklamalarını üzeler.

Resmen Rusiye tarafından işğal etilgen Qırım ve esas Ukraina tarafınen naqliy alâqa 2014 senesinden berli qapalı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG