Bağçasarayda «Hizb ut-Tahrir» teşkilâtınen bağlı olması ve terrorizm ile qabaatlanğan Qırım musulmanlarınıñ evleri yanında kelecek cumaertesi ve bazar künleri dua keçirmek niyetlendiler.
Bu aqta «Qırım siyasiy mabusları» gruppasında bildireler.
Gruppa malümatına köre, iyül 2-de, cumaertesi künü, duanı Enver Mamutovnıñ evi yanında keçirecekler, iyül 3-de, bazar künü, ise Remzi Memetovnıñ evi yanında keçirecekler.
«Bu muqaddes Ramazan ayında qardaşlarımızğa qoltutayıq, Allahqa dua eteyik! Dundan soñ er kesni 6-ci qasabanıñ Cami azbarında keçecek iftarğa davet etemiz», – dep aytıla haberde.
Dualarda iştirak etmek içün Qırım ve Bağçasaray sakinleri davet etile.
Böyle dualarnı musulmanlar içün muqaddes Ramazan ayı kelgen soñ Qırımda muntazam sürette keçirmege başladılar.
Mayıs 12-de Rusiye uquq qoruyıcıları musulmanlarnıñ evlerinde ve yerli qavehanede bir sıra tintüv keçirip, insanlarnı yaqaladılar, soñra ise apis ettiler – Enver Mamutov, Remzi Memetov, Zevri Abseitov ve Rustem Abiltarovnı.
Rusiyege boysunğan Qırım prokuroturası mabuslarnı «Hizb ut-Tahrir» teşkilâtınen bağ olğanları ile qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti. Bu teşkilât Rusiye, Özbekistan, Qazahistan, Qıtay, Almaniya, Asiya ve Afrikanıñ bazı devletlerinde yasaq etildi. Ukraina ve Ğarp memleketleriniñ çoqusında onıñ faaliyeti qanun boyunca alıp barıla bile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
