Kremlge boysunğan Qırımnıñ Yuqarı mahkemesi iyül 1-de, cuma künü, «Hizb ut-Tahrir» işiniñ 2016 yılınıñ aprel ayında tutıp qapatılğan 2 şahsı – Refat Alimov ve Arsen Cepparovnıñ apis vaqtını uzatması boyunca şikâyet arizasını muzakere etecek. Cepparovnıñ adliyecisi Cemil Temişev bunı Qırım.Aqiqatqa tasdıqladı.
«Qırım Yuqarı mahkemesinde, saat 10.00. Kyiv rayon mahkemesiniñ apis vaqtını uzatması qararı boyunca. Eki ayğa qadar uzattılar», – dep qayd etti Cemil Temişev.
İyün 17-de Aqmescit Kyiv rayon mahkemesi Refat Alimov ve Arsen Cepparovnıñ apiste bulunmasını sentâbr 8-ge qadar uzattı.
Qızıltaş (Büyük Yalta) köyünde aprel 18-de Rusiye uquq qoruyıcıları tintüv keçirip eki qırımtatarını – Refat Alimov ve Arsen Cepparovnı tutıp qapattılar. Rusiyege boysunğan Qırım prokurorı Natalya Poklonskaya Yaltada «Hizb ut-Tahrir» teşkilâtınen bağlı olması ile qabaatlanğan eki kişi yaqalanğanını aydınlattı.
Federal havfsızlıq hızmeti aprel 12-de Refat Alimov boyunca cinaiy iş açtı, amma qorantası bunıñ aqqında bildirmeni tek Refatnıñ tevqidinden soñ aprel 23-de aldı.
Bu sene fevral ayınıñ 11 ve 12 künleri Rusiye uquq qoruyıcıları Qırımdaki islâm tarafdarlarnıñ evlerinde bir sıra tintüv ve yaqalanmalarnı keçirdiler. Cemi 14 kişi yaqalandı, olardan dört kişi apis etildi: Yaltadan insan aqları kontakt gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve yaltalı Vadim Siruk. Federal telükesizlik hızmetiniñ taqiqatçıları olarnı Rusiyede yasaqlanğan «Hizb ut-Tahrir» teşkilâtınen bağlı olğanında qabaatladılar.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
