Link açıqlığı

İyün 29-da çarşenbe künü Qırımnıñ eñ büyük naqliye şirketi olğan «SimSitiTrans» işhanesiniñ işini blok ettiler, onı Qırım qamaçavı aktsiyasınıñ lideri Lenur İslâmovnen bağlaylar.

Qırım mühbiri Elzara İslâmovanıñ bildirgenine köre, şirket avtobusları marşrutlarğa çıqmadı.

«Soñki 14 yıl devamında ilk sefer «SimSitiTrans» avtobusları şeer ve şeerlerara seferlerge çıqmadı. Mahkeme temsilcileriniñ federal hızmeti saat 6.00-da işhaneniñ faaliyetini toqtattı», – dep yazdı İslâmova Facebook saifesinde.

Kremlge boysunğan Aqmescit memuriyetiniñ matbuat hızmetinde bildirgenlerine köre, memurlar «işbu taşıyıcınıñ şeer marşrutlarında deñiştirüv» işlerini alıp bardı.

«Şimdiki vaqıtta cemaat naqliyesiniñ kerekli miqdarda maşnalar marşrutlarğa çıqtı», – dep bildirdiler matbuat hızmetinde.

Aqmescit sakinlerini «ola bilecek oñaytsızlıqqa añlap davranmağa» çağıralar.

«SimSitiTrans» şirketiniñ yolbaşçılığınıñ işbu vaqia boyunca izaatları daa yoq.

Mayıs 20-de Aqmescit memuriyetiniñ reisi Gennadiy Baharevniñ bildirgenine köre, memuriyet «SimSitiTrans» şirketinen yedi avtobus marşrutı boyunca añlaşma munasebetlerini toqtattı.

Mayıs 20-de rusiyeli uquq qoruytıcılar Qırımnıñ eñ büyük naqliye şirketi «SimSitiTrans» işhanesinde kene de tintüv keçirdi.

Bundan evel, 2016 senesi fevral ayında şirket ofisi endi tintüvden keçirildi. O vaqıt maskalı ve silâlı uquq qoruyıcılar naqliye işhanesiniñ işini blok etti.

Rusiyege boysunğan Qırım prokurorı Natalya Poklonskaya o vaqıt ilân etti ki, «SimSitiTrans» Aqmescit şirketiniñ faaliyetini kimse blok etmedi, fevral 1-de işhanede iç taqiqat faaliyeti alıp barılmadı. Onıñ sözlerine binaen, uquq qoruyıcılar işhanege bundan evel belgilengen bozmalar aqqında ihtarnı bermek içün keldi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG