Rusiyege boysunğan Qırım ükümetiniñ yolbaşçısı Sergey Aksönovnıñ qayd etkenine köre, Rusiye ve Türkiye arasındaki munasebetlerniñ ola bilecek deñişmeleri Qırımğa turist aqınına tesir etmeycek. Bu aqta o, iyün 28-de keçirilgen brifingde ilân etti, dep bildire rusiyeli Qırım ükümetiniñ matbuat hızmeti.
«Erdoğan afu sorağanı yahşı. Aqlı olmağanını tanımaq – insannıñ namuslı bir hususiyetidir. Endi devletimizniñ lideri nevbetteki adımlar boyunca kerekli qarar alacaqtır. Amma turist aqınına bu iç te tesir etmez. Bu mevsimge bütün putövka ve biletler satın alındı, bunıñ içün kimse başqa yerge deñiştirip baralmaz. İşte, menimce, bu qarar Qırımğa bu mevsimge aqibetler ketirmez», – dedi Aksönov.
Yaqında Aksönov bildirdi ki, 2016 senesiniñ başından Qırımnı milliondan ziyade turist ziyaret etti. Amma Qırım sakinleri içtimaiy ağlarda boş yalılarnı köstergen fotoresimlerni paylaşa.
2016 senesiniñ başında o, bu sene Qırımda «büyük turist aqınını» beklegenini ilân etken edi, çünki şimdiki vaqıtta rusiyeliler içün Türkiye ve Mısır kibi populâr yönelişler qapatılğan.
Rusiye ve Türkiye arasındaki munasebetler keçken sene noyabr 24-te Türkiye ve Suriye sıñırı yanında rusiyeli Su-24 bombardir uçağı urulğan soñ kerginleşti. Ankara, uçaq Türkiye ava boşluğına kirgenini ayta, Moskva ise, bunı red ete. Bundan soñ Rusiye Türkiyege qarşı sanktsiyalarnı kirsetti.
İyün 27-de Kremlde ilân ettiler ki, Türkiye prezidenti Recep Tayyip Erdoğan türkiyeli askerler urğan rusiyeli bombardir uçağı içün afu soradı ve vaziyetniñ eyileşmesine merağını bildirdi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
