Aqmescitte edebiy qırımtatar tiliniñ yekâne qaidelerini işlep çıqarmaq kerekligini muzakere ettiler, dep bildire Rusiyege boysunğan Qırım ükümetiniñ Tasil nazirliginiñ matbuat hızmeti.
Elde etilgen malümatqa köre, Qırım müendis ve pedagogika universitetiniñ esasında Tasil nazirligi «Qırımtatar tili: elifbe, urufat, imlâ» mevzulı «tögerek masa» keçirdi. Merasimde tecribeli ocalar, umumtasil müessiseleriniñ yolbaşçıları, aliy oquv yurtlarınıñ ocaları, tilşınaslar, mühbirler ve qırımtatar tilinde neşirlerniñ muarrirleri, yazıcılar, icadiy ziyalılar temsilcileri iştirak etti.
«İştirakçiler edebiy qırımtatar tiliniñ yekâne qaidelerini işlep çıqarmasınen bağlı meselelerni muzakere etti. Olar, imlâ tek sözlerniñ doğru, er kes içün yekâne, yazılmasına degil de, adamlarğa bir birini doğru añlamağa yardım etkeni aqqında bir fikirge keldi. İmlâ ve punktuatsiyanen belgilengen yekâne qaidelerniñ qullanılması yazma ve ağzaviy qonuşmanı qolaylaştıracaq, talebelerge imlâ ve punktuatsiyanı ögrenmege yardım etecek», – dep aytıla beyanatta.
Qırım Tasil nazirliginiñ matbuat hızmetinde bildirdiler ki, «qırımtatar imlâsı büyük reformalarğa muhtac degil, amma onıñ, ögrenciler qolay ögrensin dep, zıt, eki manalı, eskirgen añlamalardan temizlenmesi kerek».
Qırımtatar tili UNESCO tarafından ğayıp olayatqan ve qorçalavnı talap etken til olaraq tanıldı. Qırım işğal etilgen soñ ukrain ve qırımtatar tilleri inkişaf etmegeninden ğayrı, olarnıñ mekteplerde ögrenilmesi de azlaştırıla. Bu aqta Meclis temsilcileri bir qaç sefer bildire edi.
Kiyevde teşebbüs gruppası Ukraina Nazirler kabineti içün latin urufatında qırımtatar elifbesiniñ tasdıqlanması boyunca qanun leyhasını azırlağanını bildirdi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
