Rusiyege boysunğan Qırım ükümetiniñ yolbaşçı muavini Mihail Şeremet iyün 26-da keçirilgen toplaşuvda ilân etti ki, salı-çarşenbe künlerine qadar sakinleri merkeziy suvnen teminlenmeden marum qalğan Eski Qırımğa Kriniçansk suv qorasından 5,5 kilomterni teşkil etken suv boruları qoyulacaq, kelecek bazarertesi kününe qadar ise, aynı böyle uzunlığında diger suv anbarından borular qoyulacaq.
İşbu tedbirler rusiyeli Qırım yolbaşçısı Sergey Aksönovnıñ Eski Qırımda merkeziy suvnen teminlenmeni yañıdan qurmaq avalesi çerçivesinde teşkil etildi. 10 biñ kişilik şeer endi bir ay devamında merkeziy suvnen teminlenme olmadan yaşay. Aynı vaziyet Aluşta rayonındaki Aşağı Şuma (Nijnâya Kutuzovka) köyünde. Bu yerge suv avto tsisternalarnen ketirile, amma ava sıcaq olğanından sebep ealige suv yetmey. Bu munasebetten suv taşığan maşnalarnıñ sayısını arttırmaq ve, kerek olsa, arbiy tehnikanı qullanmaq avale etildi.
2014 senesi Şarqiy Qırımda suvnen teminlenme meselesiniñ çezilmesi içün Rusiye Ğarbiy arbiy okrugı bölüginiñ suv boruları qoyuv bölükleri qullanılıp başladı. Olar muvaqqat 40 kilometrlik suv borularını qoydı, suv Prostornenskiy ve Nejenskiy suv qorası qavuşağından Şimaliy-Qırım kanalınıñ şarqiy pıtağına keçirile edi. O vaqıt askerler aynı böyle muvaqqat suv borularını Eski Qırımğa qomşu Kriniçki köyünden keçirdi. Bu ise, yerli ükümetniñ Şarqiy Qırımda suvnen teminlenme meselesi çezilgenini ilân etmesi içün sebep oldı.
Qırım Rusiye tarafından işğal etilgen soñ Ukraina yarımadağa Şimaliy-Qırım kanalında suv berilmesini toqtattı. Bu kanal vastasınen Ukraina Qırımnıñ suv ihtiyaclarınıñ 85 fayızını teminley edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
