İyün 26-da aqşam bir qaç yüz faal Kiyev merkezinde 39 metrlik qırımtatar bayrağınen yürüşte iştirak etti. Bu aqta Qırım.Aqiqat mühbiri bildire.
Aktsiya teşkilâtçılarınıñ bildirgenine köre, bu bayraq dünyada eñ büyük sayıla. 6 metr keñliginde ve 39 metr uzunlığında 40 kiçik bayraqtan tikilgen büyük bayraq Türkiyeden ketirildi.
«Bu büyük bayraq Türkiyeden, Ankaradan ketirildi. Teşebbüsni qırımtatar diasporamız bildirdi. Olar bu bayraqnı tikti ve bizge yolladı. Bundan da ğayrı, onıñ temsilcileri bu yerde buluna. Olar Kiyevge keldiler», – dep añlattı Qırım.Aqiqatqa Qırımtatar Milliy Meclisiniñ azası Eskender Bariyev.
Kolonna başında qırımtatar lideri, Ukraina halq deputatı Mustafa Cemilev oldı.
«Qırımtatar bayrağı, şimdiki vaqıtta işğalge qarşı narazılıqnıñ timsali ola, tek qırımtatarlar içün degil de, Qırımnıñ azatlığı içün küreşken bütün milletler içün. Aynı vaqıtta o, şimdiki ukrain halqınıñ qırımtatar cemaatçılığı ile Qırımnıñ azatlığı oğrunda küreşte işbirlik timsali ola», – dep ayttı Mustafa Cemilev Qırım.Aqiqatqa bergen intervyusında.
Aktsiyağa Qırımtatar Milliy Meclisiniñ reisi Refat Çubarov, Qırım sakini ve sabıq siyasiy mabus Gennadiy Afanasyev, Ukraina haber siyaseti naziriniñ birinci muavini Emine Ceppar da qoşuldılar. Yürüş iştirakçileri arasında Qırım, Lvov, Ankara ve İstanbuldan kelgen qırımtatarlar oldı.
Mustaqillik Meydanında yürüşten soñ kontsert taqdim etildi, programma Ukraina ve qırımtatar halqınıñ gimnlerinden başlandı.
Qırımtatar bayrağı künü bir qaç yıl evel Qırımda qayd etilip başladı. Bayram künü, 1991 senesi iyün 26-27 künleri Aqmescitte keçirilgen ekinci Qırımtatar Qurultayınıñ ilk künü olğan kün belgilendi.
Qırımtatar bayrağı, üstünde altın tamğa olğan kök tüsteki ketenden ibarettir.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
