Link açıqlığı

Qırımda Elmira Ablâlimova, şimdiki vaqıtta Aqmescit apishanesinde bulunğan Qırımtatar Milliy Meclisiniñ reis muavini Ahtem Çiygoznıñ apayı, onıñ evinde Çiyğozğa destek köstermek maqsadınen keçirilecek dua arfesinde «Qanunsız faaliyet mümkün olmaması aqqında» ihtar aldı.

Bu aqta Elmira Ablâlimova iyün 24-te, cuma künü Facebook saifesinde bildirdi.

Onıñ sözlerine köre, iyün 24-te, cuma künü saat 16:00-da yerli politsiya idaresiniñ hadimleri oña vesiqa ketirdi, amma Ablâlimova ihtarğa imza qoymaqnı red etti.

«Bu afta qırımtatar cemaatçılığı evimizde dua keçirmek teşebbüsini bildirdi. Dua, ne demektir? Bu, Allahqa belâ ve felâketten saqlamaq, sağ olğanlarğa sağlıq ve ölgenlerge mağfiret bermek muracaatınen dua etmektir... Lâkin, böyle merasim bile telükeli sayılır, eken. Saat 16:00-da maña qanunsız faaliyet mümkün olmaması aqqında ihtar bermek içün rayon militsiya bölüginiñ hadimleri keldi. Vesiqanı imzalamadım, çünki men öz evimde bulunam ve istegen kişini davet etmek aqqım bar», – dep bildirdi Elmira Ablâlimova.

Elmira Ablalimovanıñ aqayı Ahtem Çiygoz 2015 senesi yanvar 29-dan başlap Aqmescitte apiste buluna. Aprel 29-da onıñ apiste bulunma müddeti iyül 22-ge qadar uzattırıldı.

Rusiyege boysunğan Qırım Yuqarı mahkemesi mayıs 13-te «fevral 26 işi» boyunca qabaatlanğan Ahtem Çiygoz ve Ali Asanovnıñ apiste bulunma müddetiniñ uzattırılması boyunca imayeniñ şikâyet arizasını red etti.

Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksönov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.

2016 senesi mayıs 17-de Qırım Muhtar Cumhuriyeti prokuraturası 2014 senesi fevral 26-da Qırım parlamenti yanında barışıq toplaşuvınıñ keçirilmesine mania olması boyunca cinaiy iş açtı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG