Moskvağa boysunğan işğal etilgen Qırım ükümetiniñ bildirgenine köre, yarımadağa Ukraina qıtaiy territoriyasından kirişte nevbetler yoq.
Kreml tarafından tayinlengen yarımada yobaşçısınıñ birinci muavini Mihail Şeremet ayta ki, bu, memuriy sıñırda keçirme pencereleriniñ sayısı artqanı sayesinde mümkün oldı.
«Keçirüv pencereleriniñ ve gümrük hızmeti hadimleriniñ sayısı eki qat arttırıldı. Demek ki, bunıñ neticesinde keçirüv noqtalarında nevbetler yoq», – ayttı Şeremet, dep bildire Rusiyege boysunğan Qırım ükümetiniñ matbuat hızmeti.
Mihail Şeremetniñ qayd etkenine köre, o, «Ermeni Bazar» ve «Perekop» noqtalarını ziyaret etken vaqtında, «kiçik meseleler» belgilendi.
İyün 24-te Qırımtatar Milliy Meclisi reisiniñ birinci muavini Nariman Celâl memuriy sıñırda büyük nevbetler olğanı aqqında bildirdi. O, Facebook saifesinde nevbette turğan insanlar ve maşnalarnı köstergen fotoresimlerni paylaştı.
«Bir qaç yüz yengil maşna (bu tek «Çonğarda»), yüzlerce yayav ketken yolcular.
İşte, tüşünem ki, ya Ukraina Anayasa kününe büyük teşviqat desantını yollay, ya Aksönovnen nasıldır añlaşma bardır – Qırımda kurort mevsimini yükseltmek», – dep yazdı Celâl.
Bu sene mayıs ayında Rusiyege boysunğan Qırım gümrügi müdiri Vladimir Avramenko, onıñ müessisesi, «memuriy sıñırdan keçken naqliyeniñ sayısı artqanı sebebinden», yarımada şimalinde avtomobil keçirüv noqtalarınıñ operativ-nevbetçi smenalarını qaviyleştirdi.
2014 senesi Qırım Rusiye tarafından işğal etilgen soñ qıtaiy Ukraina ve yarımada arasında resmiy şekilde – memuriy, amelde ise – aqiqiy bir sınır peyda oldı. Memuriy sıñırda üç kiriş-çıqış noqtası çalışmaqta – «Kalançak», «Çonğar» ve «Çaplınka».
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
