Rusiyege boysunğan Qırım Yuqarı mahkemesi «Hizb ut-Tahrir işi» boyunca terrorizmde qabaatlanğan üç musulmannıñ – Vadim Siruk, Muslim Aliyev ve Enver Bekirovnıñ apiste bulunma müddeti uzattırılmasına qarşı şikâyet arizasını red etti.
Bu aqta «Qırım siyasiy mabusları» gruppasında bildireler.
Mahkemeciler yaqalanğan kişilerniñ apiste bulunma müddetini aynı, sentâbr 8-ge qadar, qaldırdı.
Qırımtatar uquq qoruyıcısı Emir-Usein Kukunıñ şikâyet arizasını, onıñ imayecisi olmağanı sebebinden, iyün 28-ge saat 13.00-ke keçirdiler.
Gruppanıñ bildirgen malümatına binaen, toplaşuv konfetentsiya bağı şeklinde keçirile edi. Yaqalanğanlar sağlığı yerinde olmağanına ve SİZO-daki yaramay şaraitke şikâyet ete edi, olar o yerde endi 4 aydan ziyade yaşay.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Episi dört kişi şimdiki vaqıtta Aqmescit apishanesinde buluna.
«Hizb ut-Tahrir» – halqara islâm siyasiy firqasıdır. Onıñ resmiy maqsadı islâm devletini ve musulman yaşayış tarzını qurmaqtır. Bu teşkilât Rusiye, Qazahistan ve Almaniyada yasaq etildi; Ukraina ve diger memleketlerde onıñ faaliyeti qanun boyunca keçirile bile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
