Qırımtatar Milliy Meclisiniñ reisi, Ukraina Yuqarı Radası deputatı Refat Çubarov Qırım qamaçavı aktsiyasınıñ idarecisi Lenur İslâmovnıñ bazı aytqan şeyleri edalı olmağana işaret etti.
Bu aqta Çubarov, «Maniasız Avropa» tarafından iyün 23-te teşkil etilgen «Ukraina terkibinde qırımtatar muhtariyeti. Yañı Qırım nasıl olmalı?» mevzulı munaqaşalar çerçivesinde öz yardımcısınıñ işi ve areket tarzı aqqındaki sualge cevap berip, qayd etti, dep bildire Qırım.Aqiqat mühbiri.
«İslâmov efendiniñ bazı aytqan şeyleri aqaretleyici şeklini taşıy, bu aqta oña men, Meclis reisi olaraq, ayttım, em de liderimiz Mustafa Cemilev ayttı», – dep qayd etti Çubarov.
Lenur İslâmovnıñ eki vatandaşlığı aqqında sualine Refat Çubarov böyle cevap berdi: «bütün yardımcılarım Ukraina vatandaşları ola».
İş adamı, ATR qırımtatar telekanalınıñ saibi Lenur İslâmov Qırım qamaçavı aktsiyasınıñ ştabı yolbaşçısı, Ukraina halq deputatı Refat Çubarovnıñ yardımcısı ola, Bütün Dünya Qırımtatar Kongressiniñ reis muavini vazifesinde buluna.
Yarımada Rusiye tarafından işğal etilgen bir yıldan soñ öz telekompaniyasını qıtaiy Ukrainağa keçirdi ve Herson vilâyetinde memuriy sıñırda Qırım qamaçavı aktsiyasını idare etmege başladı. Bundan evel o, Qırımda Rusiyege boysunğan Sergey Aksönovnıñ ükümetinde biraz çalıştı. İslâmovnıñ qayd etkenine köre, Qırım boyunca noqta-i nazarı içün yarımadada biznesinden marum qaldı.
Qırımda Qırım qamaçavı idarecisine qarşı cinaiy iş açılğanı aqqında ilân etilgen edi.
İslâmovnıñ em tarafdarları, em de onıñ areketlerini tenqit etken kişiler bar. Böyleliknen, Lenur İslâmov yaqında «Muhbir taqiqatı merkezi» («Tsentr jurnalistskih rassledovaniy») neşrine intervyu berip, içtimaiy ağlarda munaqaşalarğa yol bergen sözler ayttı. Hususan, o, «Ukraina qırımtatarlarğa pek çoq para borclu», dep ilân etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
