Link açıqlığı

Özlerini Noman Çelebicihan adına batalyonnıñ askerleri dep adlandırğan ve Rusiye tarafından işğal etilgen Qırım ile memuriy sıñırda bulunğan, Qırımdan olğan göñülliler yarımada tarafına ukrain bayrağı tüslerindeki ava kürreçiklerini yolladı.

Bu aqta Qırım qamaçavı aktsiyasınıñ idarecisi Lenur İslâmov bildirdi.

«Bugün Noman Çelebicihan batalyonınıñ askerleri sıñırdan işğalci içün ava mektüplerini yolladı. Kürrelerdeki yazılarnı oquñız, toprağımızda sizge raat olmağa bermeycekmiz», – dep yazdı İslâmov Facebook saifesinde.

Böyle mektüplerge Qırım tarafından rusiyeli temsilcilerniñ izaatı daa yoq.

İyün 20-de Meclis reisi Refat Çubarov bildirdi ki, Herson vilâyetine Qırımdan göñülliler çıqtı, olar qırımtatar batalyonınıñ resmiy teşkil etilmesini bekley.

Ukraina uquq qoruyıcı organlarınıñ terkibinde qırımtatar batalyonınıñ teşkil etilmesi boyunca muzakereler keçken seneden başlap devam ete. Mecliste bu mesele boyunca bütün malümat Ukraina prezidenti Petro Poroşenkoğa ve İçki işler nazirligi yolbaşçısı Arsen Avakovğa teslim etilgeni aqqında bildire ediler.

Ukraina İçki işler nazirliginiñ terkibine kirgen Ukraina Milliy Gvardiyasında qayd eteler ki, olarnıñ terkibinde qırımtatar batalyonınıñ teşkil etilmesi aqqında arizalar şimdilik tek arizalar seviyesinde qala, olar ise qanun tarafından qayd etilmegen.

Lenur İslâmov teşkil etilgen qırımtatar batalyonına arbiy nomerniñ berilmesini talap ete.

Kremlge boysunğan Qırım ükümeti ve Qırım ve Sevastopol şeeri musulmanları diniy idaresi qırımtatar liderlerini, olarnıñ ukrain ordusı terkibinde qırımtatar batalyonını teşkil etmek planları içün, bir qaç sefer tenqit ete ediler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG