İşğal etilgen Keriçte Qırımtatar bayrağı kününe bağışlanğan avto yürüşni iyün 26-da keçirmeycekler. Bu aqta Kremlge boysunğan şeer memuriyetiniñ matbuat hızmeti bildire.
Bildirilgen malümatqa köre, merasimni diger bir kün keçirmek qararı alındı.
«Muqaddes musulman Ramazan ayınıñ yekünlenmesi munasebetinen şeerde bir sıra merasimler, bu cümleden avto yürüş, istidat taqımlarınıñ çıqışları, milliy aşlarnen sıylama teşkil etilecek. İyün 26-da keirilmesi planlaştırılğan avto yürüş musulman orazası yekünlenmesine bağışlanğan bayram programmasına kirecek», – dep aytıla beyanatta.
Avto yürüş keçirilecek tarih, vaqıt ve yer aqqında malümat bildirilmey.
Qırımtatar bayrağı kününe bağışlanğan merasimler Kiyevde ve Herson vilâyetinde de keçirilecek. Programma çerçivesinde resim yarışı, avto yürüş ve vatanperverlik mitingi teşkil etilecek.
Qırımtatar bayrağı künü bir qaç yıl evel Qırımda qayd etilip başladı. Bayram künü, 1991 senesi iyün 26-27 künleri Aqmescitte keçirilgen ekinci Qırımtatar Qurultayınıñ ilk künü olğan kün belgilendi.
Qırımtatar bayrağı, üstünde altın tamğa olğan kök tüsteki ketenden ibarettir.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
