Adliyeci Aleksandr Popkovnıñ bildirgenine köre, yarımadada «Hizb ut-Tahrir» işi boyunca yaqalanğan Qırım musulmanlarını Aqmescit SİZO-sında azaplarğa oğratmaylar ve köteklemeyler, amma olarğa qarşı diger tedbirlerni alıp baralar. Meselâ, islâmda yasaq etilgen domuzlı aşlarnı aşatalar.
Bu aqta o, Qırım.Aqiqat Radiosınıñ saba yayınında bildirdi.
«SİZO-da dayanılmaz şarait. Ve qoqram ki, musulmanğa domuz etinen pişirilgen aş künde üç kere berilse, böyleliknen qoşma basqın yapıla. Olarnıñ kameraları adamlarğa tolu, olar nevbetnen yuqlay, olarnı tahta bitleri, böcekler, qan içkenler aşay», – dep ayttı adliyeci, SİZO-da bulunğan onıñ imaye etken Emir-Usein Kukunıñ kündelik ayatını añlatıp.
Adliyeciniñ sözlerine köre, SİZO hadimleri apiste bulunğanlarnıñ ricalarını körmemezlikke ura, em de olarnıñ ayatını daa ağırlaştıra.
«O (Emir-Usein Kuku), tahta bitleri bar, olar tişley, dep ariza yazsa, oña yañı çarşaf berile. O, maña normal bir aş beriñiz, men domuzdan aşnı aşap olamayım, dep yazsa, oña künde bir kere degil de, üç kere bu aşnı bereler. Bu, elbet, qoşma basqındır», – dedi Popkov.
Aqmescit SİZO yolbaşçılığınıñ bu aqta izaatları yoq.
Qırım SİZO-sında dayanılmaz şarait aqqında uquq qoruyıcılar çoq aytqan edi. Aqmescit SİZO-sında qaidelerge uymağan şarait olğanını rusiyeli ombudsmen Tatyana Moskalkova da bildire edi, o bu sene mayıs ayında Qırımnı ziyaret etti.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Episi dört kişi şimdiki vaqıtta Aqmescit apishanesinde buluna.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
