«MTS Ukraina» şirketiniñ Rusiye tarafından işğal etilgen Qırımda öz territorial idaresi yoq ve bunıñ içün Qırım abonentlerinen şirketniñ iç munasebetleri de yoq. Böyle etip, «MTS Ukraina» Aqyar akimiyetiniñ şirketke ve sanki onıñ territorial idaresine qarşı açtırğan mahkeme davası aqqında malümatqa izaat berdi.
«Şirketimizniñ Qırım territorial idaresi yoq, Qırımda çalışmaymız. Biz Qırımdan kettik, bütün donatmalarnı sattıq, territorial idaresinde çalışqan adamlarnı işten boşattıq... Trafikniñ marşrutizatsiyasını yapmaymız. Qırım abonentlernen iç munasebetimiz yoq. Donatmalarımız ve abonentlerimiz o yerde yoq», – dep bildirdi Qırım.Aqiqatqa «MTS Ukraina» şirketiniñ cemaatçılıq ile bağ bölüginiñ müdiri Viktoriya Ruban.
Rusiyege boysunğan Aqyar arbitraj mahkemesiniñ saytında Aqyar mal ve topraq munasebetleri boyunca bölügi «MTS Ukraina» ve ukrain şirketiniñ Qırım territorial idaresine qarşı doquz mahkeme davasını açtırğanı aqqında malümat yerleşe. Memurlarnıñ fikrince, operator donatmalar içün meydançıqlarnıñ kirası içün para borcunı tölemedi ve 2015 senesi yanvar-sentâbr ayları devamında olarnı qanunsız qullana edi.
Qırım Rusiye tarafından işğal etilgen soñ bütün ukrain bağ operatorları yarımadanı terk etti. 2014 senesi avgust ayından başlap, MTS şirketiniñ bölügi olğan «MTS Ukraina» bağı Qırım territoriyasında işini bütünley toqtadı. Şirket yarımadada rusiyeli «K-Telekom» işini başlağan soñ yavaş-yavaş öz ağlarını söndürmege başladı.
Bundan soñ «MTS Ukraina» Qırım abonentlerine «K-Telekom» ağına bir taraflı tehnikiy rouming esasında hızmetlerini yañıdan taqdim etmege başladı. 2014 senesi oktâbr ayınıñ soñunda «MTS Ukraina» şirketinde Qırımda idare ve eki filial qapatması aqqında bildirdiler. Bundan da ğayrı, şirket Qırımdaki malını 17,7 million evro fiyatınen eki şahsiy yatırımcığa sattı, olarnıñ adları bildirilmey.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
