Link açıqlığı

Çiygoznıñ apayı: Ahtem azat etilgen soñ, ükümetke boysunğan qırımtatar liderleriniñ rolü tüzlenir


Ahtem Çiygoz

İşğal etilgen Qırımda yaqalanğan Qırımtatar Milliy Meclisiniñ reis muavini Ahtem Çiygoznıñ apayı Elmira Ablâlimova, onıñ aqayı yarımadada qırımtatarlarnıñ itibarlı lideri olmağa devam ete, dep saya, bunıñ içün onıñ apiste bulunması rusiyeli ükümetke «hızmet etken» qırımtatar erbapları içün elverişlidir.

Böyle fikirni o, Qırım.Aqiqat Radiosınıñ saba yayınında bildirdi.

«Bu menim şahsiy, belki de, subyektiv fikrimdir. Onıñ mında bulunması olar içün iç te kerekmey, çünki Ahtem azat etilip Qırımda olsa, soñ olarnıñ (ükümetke boysunğan qırımtatarlarnıñ – QA) rolü sıfır olacaq. Olarnıñ tırnaqlı, böyle aytayıq, itibarı endi körüne... Azatlıqta bulunğan Ahtem Çiygoz ise, olarnıñ rolüni sıfırğa tüzler», – dedi Elmira Ablâlimova.

Çiygoznıñ apayı aqayınıñ işi boyunca ceryannı «sımarlanğan» dep saya, ve mahkeme qararı evelden belli olğanında emin.

Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksyonov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar. Olarnıñ arasında Ahtem Çiygoz da oldı.

Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste bulunğan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.

2016 senesi fevral ayında Qırım Yuqarı mahkemesi bu işni tekrar taqiq etilmesine yollamağa qarar aldı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG