Avropa Şurası Parlament assambleyasında Ukraina eyyeti PACE baş kâtibiniñ yıl esabatında Qırım ve Donbassta insan aqları bozulması aqqında malümat olmağanından çorlana.
Bu aqta eyyet azası, Ukraina Yuqarı Radasınıñ spiker muavini İrina Geraşenko bildire.
«104 saifede işğal etilgen Qırımda ve Donbassta insan aqları bozulması aqqında bir söz bile yoq, qırımtatarlarnıñ azapları ve apiske qapatılması, reineler, ömür, söz serbestligi, havfsızlıq aqqı bozulması iç añılmay», – dep qayd etti Geraşenko.
Onıñ sözlerine köre, bu sual şahsen Yaglandğa yollanılğan. Alınğan cevapnı Geraşenko «utanmazca» dep adlandırdı.
«Fikrimizce, Yagland deşetli ve utanmazca cevap berdi! O, ilan etti ki, işğal etilgen Qırımda ve Donbassta insan aqları vaziyeti aqqında malümat insan aqları boyunca maruzağa kirmedi, çünki bu maruzağa Avropa Şurasınıñ Mahsus nezaret missiyalarınıñ malümatı kire ve ilâhre. Qırım ve Donbassqa keçken sene iç bir missiya yiberilmegeni sebebinden maruzağa iç malümat kirsetilmedi!» – dep yazdı Geraşenko Facebook saifesinde.
Spiker muavininiñ qayd etkenine köre, ukrain eyyeti bu noqta-i nazarından çorlanğanı aqqında mektüp azırlay.
Tünevin Strasburg şeerinde PACE yaz sessiyasınıñ açılışında ukrain eyyetiniñ azası Nadejda Savçenko PACE-ni Rusiyede ve Qırımda ukrain siyasiy mabuslarını apisten azat etmek içün imkânlarnı quvetleştirmege çağırdı.
Dört adamdan ibaret olğan Avropa Şurasınıñ eyyeti, isviçreli diplomat, elçi Jerar Ştudmannıñ yolbaşçılığında Qırımda yanvar 25-31 künleri bulundı. Bundan evel Avropa Şurası baş kâtibi Turbyern Yagland, o, Qırımğa yarımadada insan aqları vaziyetini ögrenmek içün eyyetni yollamağa qarar alğanını bildirdi.
Qırımda Avropa Şurasınıñ temsilcileri rusiyeli yarımada ükümeti, yerli prokuratura temsilcileri, qırımtatar halqı temsilcileri, Rusiye ve Ukraina taraflarını tutqan yarımada faallerinen körüşti.
Elçi Ştudman Rusiye tarafından işğal etilgen Qırımğa Avropa Şurasınıñ ziyareti neticeleri boyunca maruzanı 2016 senesi aprel ayında taqdim etti. Uquq qoruyıcılar ve cemaat erbapları bu maruzanı tenqit etti, ve Avropa Şurasına Qırımda insan aqları vaziyetini nezaret etüv boyunca tevsiyelerni yolladı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
