Link açıqlığı

Saatnıñ esas haberi

Bağçasarayda ğayıp olğan qırımtatarğa bağışlanğan dua keçirildi


Ervin İbragimovğa bağışlanğan dua, 2016 senesi iyün 19
Ervin İbragimovğa bağışlanğan dua, 2016 senesi iyün 19

İyün 19-da Bağçasarayda qırımtatarlar belgisiz ğayıp olğan Bütün Dünya Qırımtatar Kongressiniñ İcra komitetiniñ azası Ervin İbragimovğa bağışlanğan dua keçirdi. Bu aqta Qırım.Aqiqat saytı bildire.

Merasimde esasen Bağçasaray sakinleri oldı, amma Qırımnıñ diger regionlarından da adamlar keldi. Dua merasiminde Qırımtatar Milliy Meclisiniñ reis muavini İlmi Umerov, İnsan aqları boyunca Qırım kontakt gruppasınıñ idarecisi Abdureşit Cepparov, Qırımtatar Qurultayınıñ Merkeziy saylav komissiyasınıñ reisi Zair Smedlâyev iştirak ettiler.

Yanında turğan belli olmağan adamlar bunı videoğa çıqardı. Adliyeci Emil Kurbedinov bu rusiyeli uquq qoruyıcı organlarınıñ hadimleri olğanını tahmin etti.

Mayıs 24-te gece Devlet şurasınıñ sabıq deputatı, Bütün Dünya Qırımtatar Kongressiniñ İcra komitetiniñ azası Ervin İbragimov hırsızlandı, onıñ maşnası yol ortasında qaldırılğan tapıldı.

Rusiye Taqiqat komitetiniñ Qırım idaresi ğayıp olğan Qırım sakinini qıdırmağa başladı.

Bağçasarayda hırsızlanğan Ervin İbragimovnıñ soy-sopları onıñ qaytarılması içün 1 million ruble bereceklerini ilân etti.

Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG