Moskva tarafından tayinlengen işğal etilgen Qırım yolbaşçısı Sergey Aksönovnıñ qayd etkenine köre, ecnebiy sanktsiyalar yarımada iqtisadına tesir etmedi. Böyle etip o, Avropa birligi Şurasınıñ, Qırım ve Aqyar işğali munasebetinen, Rusiyege qarşı sıñırlama tedbirlerni uzattırmaq qararına izaat berdi.
«Rusiyeli Qırım endi eki yıldan ziyade sanktsiyalar şaraitinde muvafaqiyetli inkişaf ete... Qırım mahsulatı ve hızmetleri bütün Rusiye bazarında istep alına», – dep yazdı Aksönov Facebook saifesinde.
Onıñ sözlerine köre, avropalılar evel iç bir vaqıt yarımadanı iltifat etmegen edi, «bunıñ içün biz bir şey coymadıq».
İyün 17-de, cuma künü Avropa birligi Şurası qanunsız Qırım ve Aqyar işğali içün Rusiyege qarşı sıñırlama tedbirlerini bir yılğa uzattırdı, dep bildire Radio Svoboda mühbiri.
Sanktsiyalar, Qırım ve Aqyardan olğan mahsulatnıñ itali, bundan da ğayrı, Avropa birligi devletleriniñ işğal etilgen territoriyağa ihracatı, bu regionlarğa yatırım yasağından ibaret. Yarımadada turizm saası da sıñırlana. Qararğa binaen, sanktsiyalar 2017 senesi iyün 23-ke qadar devam etecek.
Kelecek afta Avropa birligi, Ukraina şarqında alıp barğan faaliyeti sebebinden, Rusiyege qarşı iqtisadiy sanktsiyalarnıñ daa yarım yılğa uzattırılması boyunca qararnı qabul etmek kerek.
Em Avropa birligi, em de Amerika Qoşma Ştatları ve «Yedi gruppası» devletleriniñ qayd etkenlerine köre, Rusiyege qarşı sanktsiyalar Minsk añlaşmalarınıñ tolusınen ömürge keçirilmesine qadar devam etecek. AQŞ-da sanktsiyalar prezident tarafından kirsetile ve uzattırıla, Avropa birliginde ise, sanktsiyalarnıñ uzattırılması er sefer bütün aza devletleriniñ razılığını talap ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
