Aqmescitteki Kiyev rayon mahkemesi iyün 17-de keçirilgen toplaşuvda 2016 senesi aprel ayında Rusiyede terroristik sayılğan «Hizb ut-Tahrir» teşkilâtınen bağlı olğanında şeklenilip yaqalanğan Refat Alimov ve Arsen Cepparovnıñ apiste bulunma müddetini uzattırdı. Bu aqta Qırımtatar Qurultayı Merkeziy saylav komissiyasınıñ reisi Zair Smedlâyev Facebook saifesinde bildirdi.
«Aqmescit şeerindeki Kiyev rayon mahkemesi Arsen Cepparovnıñ apiste bulunma müddetini sentabr 8-ge qadar uzattırdı. Refat Alimovnıñ da apiste bulunma müddetini sentâbr 8-ge qadar uzattırdılar», – yazdı o.
Aprel 17-de Yaltadaki Qızıltaş köyünde rusiyeli uquq qoruyıcılar tintüvler keçirdi, neticede eki qırımtatarnı – Refat Alimov ve Arsen Cepparovnı yaqaladılar. Bundan soñ Rusiyege boysunğan Qırım prokurorı Natalya Poklonskaya Yaltada «Hizb ut-Tahrir» ile bağda olğanında şeklengen eki insan yaqalanğanını bildirdi.
Aprel 12-de FSB Refat Alimovğa qarşı cinaiy iş açtı, amma bu aqta beyanatnı onıñ qorantası tek Refat aprel 23-te yaqalanğan soñ aldı.
Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı: Yaltada İnsan aqları bağ gruppasınıñ azası Emir-Üsein Kuku, Yalta rayonınıñ sakini Enver Bekirov, Aluşta rayonınıñ sakini Müslim Aliyev ve Yaltalı Vadim Siruk. FSB taqiqatçıları olarnı Rusiyede yasaq etilgen «Hizb ut-Tahrir» teşkilâtında iştirak etmeleri ile qabaatladılar. Episi dört kişi şimdiki vaqıtta Aqmescit apishanesinde buluna.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
