Link açıqlığı

Rusiye tarafından işğal etilgen Qırımda Şimaliy-Qırım kanalını içme ve köy hocalığı içün qullanmaq maqsadınen Donuzlav ve Sasıq-Sivaş göllerinden alınğan suvnen toldurması imkânını ögreneler. Kremlge boysunğan yarımada ükümetiniñ Suv hocalığı ve melioartsiya boyunca Devlet komitetiniñ matbuat hızmetiniñ bildirgenine köre, böyle avale Moskva tayinlegen Qırım yolbaşçısı Sergey Aksönov tarafından etildi.

«Donuzlav ve Sasıq-Sivaş göllerindeki suvnıñ himik talili, olarnıñ yüksek seviyeli mineralizatsiyasını kösterdi. Keyfiyeti böyle olğan suvarma suv topraq bereketligine, mahsuldarlıqqa ve köy hocalığı mahsulatına yaramay tesir ete. İçme ve köy hocalığında bu göllerniñ suvları qullanılması içün onıñ keyfiyetini deñiştirüvi boyunca qoşma tedbirler keçirmek kerek», – dep aytıla beyanatta.

Müessisede qayd etilgenine köre, «ukrain tarafı 2014 senesi aprel ayında Şimaliy-Qırım kanalında Dnepr suvınıñ berilmesini toqtağanınen bağlı Qırımdaki suvnen teminlev vaziyetini köz ögüne alıp», yarımadada suv menbalarını qıdırmağa devam eteler.

Qırım Rusiye tarafından işğal etilgen soñ Ukraina yarımadağa Şimaliy-Qırım kanalında suv berilmesini toqtattı. Bu kanal vastasınen Ukraina Qırımnıñ suv ihtiyaclarınıñ 85 fayızını teminley edi.

İşğal etilgen Aqyarda ameldeki akimiyet ealige suvnı tutumlı qullanmağa tevsiye etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG