Link açıqlığı

«Argumenti nedeli – Qırım»: baş muarrirniñ yaqalanması onıñ zenaat faaliyetinen bağlıdır


«Argumenti nedeli – Qırım» internet neşriniñ muarririyetinde tünevin Aqmescitte tutulğan neşirniñ baş muarriri Aleksey Salovnıñ yaqalanması aqqında bildireler. Muarririyette bu, onıñ zenaat faaliyetinen bağlı, dep sayalar.

«Tünevin «Argumenti nedeli – Qırım» saytınıñ baş muarriri Aleksey Salov yaqalandı. Yaqalanma onıñ altı yıl evel Vladimirde alıp barğan mühbir faaliyetinen bağlıdır. Aleksey doğrusını aytmaqtan, kimse begenmegen olsa da, qorqmay edi. Ve, ğaliba, regionda bunı çoq kimse begenmegen», – dep aytıla iyün 15-te derc etilgen muarririyetniñ resmiy beyanatında.

Lâkin, beyanatta Salov nasıl bir müddetke yaqalanğanı ve yaqalanmanıñ resmiy sebebi bildirilmey. Bazı malümatlarğa köre, Salov eki ayğa yaqalandı, o bu vaqıt devamında SİZO-da bulunacaq.

Muarririyet, Salovnıñ yaqalanması eñ yaqın vaqıtta çezilecek hata olğanına ümüt ete. «Er alda, zenaatdaşımıznıñ namus adı içün küreşecekmiz ve aqiqat üstün çıqması içün elimizden kelgenini yapacaqmız», – dep aytıla muarririyetniñ beyanatında.

Rusiyege boysunğan Qırım uquq qoruyıcı organlarınıñ Salovnıñ yaqalanuvı boyunca resmiy izaatları yoq.

İyün 14-te Aqmescitte Qırım mühbirleri qavehanelerniñ birinde «Argumenti nedeli – Qırım» haber saytınıñ baş muarriri Aleksey Salov yaqalanğanına şaat oldılar.

Qırım Rusiye tarafından işğal etilgen soñ Federal havfsızlıq hızmetiniñ Qırım idaresi hadimleri mühbirlerde tintüvler keçire ve olarnı sorğuğa çeke. Halqara mühbir teşkilâtları Qırımda matbuatqa basqınnı toqtatmağa bir qaç kere çağırğan edi.

Ukraina prezidenti Petro Poroşenko Rusiye tarafından işğal etilgen Qırımda kütleviy haber vastalarına nisbeten yapılğan qanunsız areketlernen bağlı olğan kişilerge qarşı şahsiy sanktsiyalarnıñ qullanması meselesini baqıp çıqmasını avale etti.

Rusiyege boysunğan Qırım ükümetiniñ qayd etkenine köre, yarımadada insan aqları bozuvı aqqında uquq qoruyıcılarnıñ beyanatları qabartılğan.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG