Rostov-na-Donu şeerinde mahküm etilgen Qırım musulmanlarınıñ adliyecilerinden biri olğan Oksana Jeleznâk çarşenbe künü sorğuğa çekilgen «sırlı» şaatnıñ delilleri şübe doğurğanını bildirdi.
Bu aqta o, Qırım.Aqiqatqa bergen izaatında ayttı.
«Bugün şaat bizge añlatıp bergen malümatnıñ doğru olğanı aqqında büyük şübemiz bar. Mahkemeden aldın taqiqat çerçivesinde keçirilgen sorğular protokolında oquğanımız ve bugün eşitkenimiz deliller, bu, elbet, farqlı deliller ve farqlı şarait. Bazı yerlerde olar aynı kele, amma çoqusı bir birine kelişmey», – dedi Oksana Jeleznâk.
İyün 15-te Rostov-na-Donu şeerinde mahkeme «Hizb ut-Tahrir» teşkilâtınen bağlı olğanında şeklenilgen Qırım musulmanları işini baqmağa devam ete. Toplaşuvda Aleksandr taqma adlı «sırlı» şaat sorğuğa çekildi.
İyün 14-te keçirilgen toplaşuvda üç şaat sorğuğa çekildi, olar, esasen, qabaatlayıcı delillerni bildirmekten vazgeçti. Kurbedinovnıñ sözlerine köre, toplaşuv «farsqa, taqiqatnıñ farsına oşamağa başlay».
Rostov-na-Donu şeerindeki Şimaliy Qavqaz okrug arbiy mahkemesi iyün 1-de dört Qırım musulmanı – Ferat Sayfullayev, Nuri (Yuriy) Primov, Rustem Vaitov, Ruslan Zeytullayevge qarşı cinaiy işni baqmağa başladı. Bu toplaşuvda prokuror olarğa qabaatlav neticesini oqudı. Qabaatlanğan Qırım sakinleri 2015 senesi Aqyar şeerinde yaqalandı. Taqiqatnıñ noqta-i nazarına binaen, olar «Hizb ut-Tahrir» teşkilâtınıñ iştirakçileri ola.
«Hizb ut-Tahrir» – halqara islâm siyasiy firqasıdır. Onıñ resmiy maqsadı islâm devletini ve musulman yaşayış tarzını qurmaqtır. Bu teşkilât Rusiye, Qazahistan ve Almaniyada yasaq etildi; Ukraina ve diger memleketlerde onıñ faaliyeti qanun boyunca keçirile bile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
