Link açıqlığı

Aqmescit merkezindeki binada Rusiye prezidenti Vladimir Putinni köstergen graffiti peyda oldı, dep bildire Qırım.Aqiqat.

Resim Aleksandr Nevskiy (Roza Lüksenburg soqağı) soqağında eki qatlı evde yapılğan. Graffitide Putin, rusiyeli prezidentiniñ fotoları birinde olğanı kibi, arbiy urbada kösterilgen.

Bundan da ğayrı, binada «Qırım – cümlemizniñ variyeti» yazısı peyda oldı.

Qırım Rusiye tarafından işğal etilgen soñ yarımadada ressamlar taqımı Putin resmi ile divarlarnı boyalay. Olar özlerini entuziast gruppası dep adlandırğan ve Qırım şeerlerinde divarlarnı öz isteginen boyalağanını aytqan ediler.

Vaqıt keçken soñ er yerde rusiyeli prezident ile graffitilerni bozmağa başladılar, Putinge Adolf Gitlerniñki kibi mıyıq qoşa, boyanen boyalay ediler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG