Link açıqlığı

Aqmesctitte «Argumenti nedeli – Qırım» haber saytınıñ muarriri Aleksey Salov yaqalandı. Bu aqta vaqia şaatları olğan yerli mühbirler bildire.

Hususan, jurnalist Anastasiya Medıntsevanıñ aytqanına köre, iyün 14-te o, Franko bulvarındaki qavehanelerniñ birinde muarrirni, oña kelepçe (naruçniki) taqıp, alıp ketkenlerniñ şaatı oldı.

Neşir muarririyetinde yüz bergen vaqia aqqında tafsilâtlı malümat yoq.

«Özümiz daa bir şey bilmeymiz. Şimdiki vaqıtta uquqçılarnen bağlanamız ve tafsilâtlı malümatnı ögrenmege tırışamız», – dep ayttılar Qırım.Aqiqatqa «Argumenti nedeli – Qırım» muarririyetinde.

Salovnıñ yaqalanması boyunca uquq qoruyıcılarnıñ resmiy izaatları yoq.

Qırım Rusiye tarafından işğal etilgen soñ Federal havfsızlıq hızmetiniñ Qırım idaresi hadimleri mühbirlerde tintüvler keçire ve olarnı sorğuğa çeke. Halqara mühbir teşkilâtları Qırımda matbuatqa basqınnı toqtatmağa bir qaç kere çağırğan edi.

Ukraina prezidenti Petro Poroşenko Rusiye tarafından işğal etilgen Qırımda kütleviy haber vastalarına nisbeten yapılğan qanunsız areketlernen bağlı olğan kişilerge qarşı şahsiy sanktsiyalarnıñ qullanması meselesini baqıp çıqmasını avale etti.

Rusiyege boysunğan Qırım ükümetiniñ qayd etkenine köre, yarımadada insan aqları bozuvı aqqında uquq qoruyıcılarnıñ beyanatları qabartılğan.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG