2014 senesi fevral-mart aylarında mahsus ameliyat çerçivesinde Qırım yarımadasını işğal etken, belgileme işaretleri olmağan rusiyeli askerlerge bağışlanğan «Nezaketli insanlar» abidesi iyün 11-de Qırım parlamenti yanında yerleşken Aqmescitteki Cumhuriyet şeer bağçasında açıldı.
Omuzında avtomat olğan eki metrlik silâlı asker, oña çiçek bağışlağan qız ve mışıq – böyledir tunçtan yapılğan abide.
2014 senesi fevral-mart aylarında Qırım sakinleriniñ rusiye askerleri ile fotoresimler rusiyeli kütleviy haber vastalarında paylaşılğan edi, işte olar müellif, Sovet Birliginiñ ressamlar Birliginiñ azası Salavat Şerbakov yapqan eykeliniñ temeli oldı.
Abideniñ açılışı iyün 12-de qayd etilgen Rusiye kününe bağışlanğan. Bu, Qırımda rusiyeli askerlerge bağışlanğan ekinci abidedir. Birinci eykel Bağçasaray miniatüra bağçasında peyda oldı.
Aqmescitteki abide içün bağış parası bir qaç ay devamında toplana edi, neticede beş million ruble oldı.
Abideniñ açılışına Kremlge boysunğan Qırım ükümetiniñ yolbaşçısı Sergey Aksönov keldi, o, Facebook saifesinde eykelniñ tantanalı açılış merasiminde yapılğan fotoresimlerni paylaştı.
Bundan da ğayrı, açılış merasiminde Rusiye prezidentiniñ vekâletli temsilcisi Oleg Belaventsev, deputatlar, Qara deñiz flotunıñ deñizcileri, kazaklar ve bir qaç yüz Aqmescit sakini bulundı. Abide qoyulmasınıñ teşebbüsçilerine Rusiye Devlet Dumasınıñ yolbaşçısı Sergey Narışkin selâmlav yolladı.
Askerler, «samooborona» temsilcileri ve kazaklar yürüş yaptı.
2014 senesi Qırım işğal etilgen vaqıtta yarımadada tanıtma işaretleri olmağan silâlı insanlar peyda oldı, olar ukrain ordusınıñ areketlerini blok ete ediler. Rusiye kütleviy haber vastalarında olarnı «nezaketli insanlar» dep adlandırdılar.
Bundan soñ, Rusiye prezidenti Vladimir Putin «Nezaketli insanlar» Rusiye Silâlı quvetleriniñ hadimleri olğanını tanıdı.
«Nezaketli insanlarğa» bağışlanğan çoyun abidesi 2015 senesi Amur vilâyetinde peyda oldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
