Qırımtatar Milliy Meclis reisi Refat Çubarov Rusiye kütleviy haber vastalarında Ukraina prezidentiniñ mesleatçısı, NATO sabıq baş kâtibi Anders Fog Rasmussenniñ intervyusı derc etilgen soñ, onı işğal etilgen Qırımnen bağlı noqta-i nazarı boyunca daa doğru malümat bermege çağıra.
Çubarovnıñ fikrince, rusiyeli kütleviy haber vastaları Rasmussenniñ Qırım meselesi ve yarımadanıñ Ukraina nezaretine qaytarılması boyunca cevabını faal paylaşa.
«Bazı ukrain kütleviy haber vastaları tarafından devam ettirilgen, «RİA Novosti» agentliginiñ noqta-i nazarında bu, böyle körüne – «Rasmussen Poroşenkoğa Qırımnı deral qaytarmağa tırışmağa tevsiye etmey...», – dep yazdı Meclis reisi Facebook saifesinde.
«Nasıl olsa da, bellesem, tek Ukraina prezidentiniñ yañı tayinlengen mesleatçısı Anders Rasmussenniñ Qırımnen bağlı noqta-i nazarı boyunca daa doğru malümat bermesi degil de, amma Ukraina Prezidenti memuriyeti de izaat bermesi kerek...», – dep qayd etti Çubarov.
Hususan, derc etilgen intervyuda Rasmussen böyle ilân etti: «Sovet Birligi tarafından üç baltik devletiniñ – Estoniya, Latviya ve Litvaniyanıñ qanunsız qoşulmasını tanımağanımız kibi, Qırımnıñ Rusiyege qoşulğanını da iç bir vaqıt tanımaycaqmız. Amma, bunen beraber, bundan eñ acele mesele yapmağa tevsiye etmeycem. O bar, bu devam etecek bir mesele, amma şimdiki vaqıtta diger meselelerge diqqat etmek kerek: islâat, «Minsk-2» tolu implementatsiyası ve ilâhre...».
Anders Fog Rasmussen 2009-2014 seneleri NATO baş kâtibi vazifesini eda etken edi. 2016 senesi mayıs ayınıñ soñunda Ukraina prezidenti Petro Poroşenko Anders Fog Rasmussenni ştat tışındaki mesleatçı vazifesine tayinleme aqqında emirni imzaladı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
