Link açıqlığı

Smedlâyev: iyün 4-te ğayıp olğan Cohar Melâsanov qayadan tüşip, elâk oldı


İşğal etilgen Qırımda ğayıp olğan 20 yaşındaki Cohar Melâsanov ölgen tapıldı. Bu aqta Qırımtatar Qurultayınıñ Merkeziy saylav komissiyasınıñ reisi Zair Smedlâyev bildirdi.

«Şimdi kederli haber keldi. İyün 4-te ğayıp olğan Cohar Melâsanov Yalta morgında buluna. İlk tahminlerge köre, o qayadan tüşti. Onıñ soy-sop ve yaqınlarına teren taziyeler bildirem», – dep yazdı Smedlâyev Facebook saifesinde.

Qırımtatar Milliy Meclisi azası Eskender Bariyevniñ bundan evel bildirgen malümatına köre, politsiya gençniñ ğayıp olması aqqında arizanı almağa red etti.

Cohar Melâsanov Qırım federal universitetiniñ 3-ci kurs talebesi ola, o, iyün 4-te yataqhaneden çıqtı ve bundan soñ onıñ bulunğan yeri belli degil edi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG