Rusiye tarafından işğal etilgen Qırımda 20 yaşındaki Cohar Melâsanovnıñ ğayıp olması aqqında malümat peyda oldı. Qırımtatar Milliy Meclisi azası Eskender Bariyevniñ Facebook saifesinde yazğanına köre, politsiya gençniñ ğayıp olması aqqında arizanı almağa red etti.
«Nasipköy (Nasıpnoye) köyünde, Vostoçnaya soqağı, 18 adresi boyunca yaşağan ana-baba, 20.05.1996 senesi doğğan olarnıñ oğlu Melâsanov Cohar Rasimoviç, TMU-niñ (QFU) 3-ci kurs talebesi 4 kün evel, iyün 4-te yataqhaneden çıqqanı ve şimdiki vaqıtqa qadar onıñ bulunğan yeri belli olmağanını bildirdi. Bugün ana-babası politsiyağa muracaat etkende, olarğa yarın muracaat etmege tevsiye ettiler», – dep qayd etti Bariyev.
Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.
Mayıs 24-te Bağçasarayda devlet şurasınıñ sabıq deputatı, Bütün Dünya Qırımtatar Kongressiniñ İcra komitetiniñ azası Ervin İbragimov ğayıp oldı.
Rusiye Taqiqat komitetiniñ Qırım idaresi ğayıp olğan Qırım sakinini qıdırmağa başladı.
Mayıs 24-te Bağçasarayda hırsızlanğan Ervin İbragimovnıñ soy-sopları onıñ qaytarılması içün 1 million ruble bereceklerini ilân etti.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
