Link açıqlığı

Rusiye tarafından işğal etilgen Qırımda Poloniya ve İspaniyadan ketirilgen 15-ten ziyade tonna meyva yoq etildi. Bu aqta Rosselhoznadzor (Rusiye köy hocalığı nezareti) Qırım idaresi bildire.

«Qırım cumhuriyeti boyunca İçki işler nazirligi ve Qırım cumhuriyeti Topraq ve fitosanitar nezareti boyunca hızmetiniñ hadimlerinen beraberlikte keçirilgen reyd neticesinde Rosselhoznadzor devlet teftişçileri 15 tonna poloniya almaları, 156 kilogramm İspaniya portaqalını meydanğa çıqardı», – dep aytıla müessiseniñ beyanatında.

Teşkerüv neticesinde, mahsulat italcısı Aq Rusiye olğanı belgilendi. Müessisede qayd etkenlerine köre, meyva yarımadağa «qanunsız yolnen» ketirildi.

«İdare qararınen, meyva büyük tehnika vastasınen Aqmescit poligonında kömme usulınen yoq etildi», – dep qayd ettiler Rosselhoznadzor idaresinde.

Şimdiki vaqıtta müessisede yasaq etilgen mahsulatnıñ ketirilüv yollarınıñ logistikasını belgilemege tırışalar.

Rusiyede ve Qırımda, evel Moskvağa qarşı, onıñ Qırımnı işğal etkeni ve Ukraina şarqında basqıncılığı sebebinden, sanktsiyalar kirsetken devletlerden aşayt mahsulatı ve köy hocalığı mahsulatınıñ italine sıñırlanma kirsetildi.

2015 senesi avgust 6-dan başlap, Rusiye prezidenti Vladimir Putinniñ emrine esaslanıp, qanunsız mahsulatnı, evel yapılğanı kibi teslim eticige qaytarmağa degil de, yoq etmege başladılar.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG