Keriç köprü quruvına para ayırılmasınen bağlı problemalar yoq, dep bildirdiler rusiyeli «TASS» agentligine Rusiye Naqliye nazirliginiñ matbuat hızmetinde.
«Keriç boğazında köpür qurulmasına para ayırılmasınen bağlı problemalarnıñ olması mümkün degil. 2016 senesi leyhanıñ ömürge keçirilmesi içün belgilengen para federal bücetinden ayırıldı. Paranıñ qullanılması devlet añlaşmasınıñ hazine refaqatına keçirilgen soñ başlanacaq. Mütenasip vesiqalar Rusiye ükümetine teslim etildi. Deñişmeler iyün soñuna qadar qabul etilecektir», – dep añlattılar Naqliye nazirliginde.
Rusiye prezidentiniñ matbuat kâtibi Dmitriy Peskov rusiyeli kütleviy haber vastalarına Keriç köprü quruvına para ayırılmasınen bağlı iç problemalarnı bilmegenini bildirdi.
«O yerde er angi problemalar barmı, bilmeyim. Amma bazı problemalar olsa da, şübesiz, yaqın vaqıtta olar al etilecektir», – dedi Peskov.
İyün 8-de Forbes neşiri Keriç köprü quruvı boyunca yapıcı şirketiniñ leyha boyunca para ayırılması tarafından problemaları bar olğanını bildirgen maqaleni derc etti. Problemalarnıñ sebebi devlet añlaşmasından hazine refaqatına keçüvi oldı. Neşir, «Stroygazmontaj» şirketiniñ baş müdiri Andrey Kirilenkonıñ rusiyeli naqliye naziriniñ muavini Yevgeniy Ditrih ve Rosavtodor yolbaşçısı Roman Starovoyt adına yazğan mektübine esaslana. Mektüpte o, Keriç köprü quruvı boyunca ükümet qararına deñişmeler kirsetilmesiniñ keçiktirilmesi ve para olmağan vaqıtta leyha boyunca işni devam etmek imkânı olmağanını qayd etti.
Keriç köprü işğal etilgen Qırımnı qomşu Kuban ile bağlamaq kerektir. Köpürde test rejiminde areketni 2018 senesi dekabr ayında açmağa planlaştıralar, obyektniñ tolusınen teslim etilmesi 2019 senesi iyün ayına planlaştırılğan. Köpür qurulmasına Rusiye bücetinden 228-den ziyade milliard ruble ayırılması közde tutula.
Keriç boğazında köpür qurmaq kerekligi aqqında Putin Qırım işğalinden soñ, 2014 senesi mart ayında ilân etti. 2015 senesi yanvar 30-da baş nazir Dmitriy Medvedev köpür quruvı boyunca baş yapıcısı olaraq «Stroygazmontaj» şirketiniñ belgilenmesi aqqında emirni imzaladı.
Ukrain tarafı Rusiyenen köpür quruvı aqqında añlaşmadan 2014 senesi, Qırım Rusiye Federatsiyası tarafndan işğal etilgen soñ çıqtı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
