Link açıqlığı

Keriç köprü qurulmasına para ayırılması toqtatıldı – kütleviy haber vastaları


Keriç köprüniñ quruvı, arhiv fotoresimi

Arkadiy Rotenbergniñ «Stroygazmontaj» şirketi baqqan Keriç köprüqurulmasına para ayırılması toqtatıldı, dep bildire Forbes neşiri, işni becergen şirketniñ yolbaşçısı Andrey Kirilenkonıñ rusiyeli Naqliye nazirligine mektübine esaslanıp.

Mektüpte qayd etilgenine köre, köpür qurulması içün «Stroygazmontaj» şirketine bücetten para soñki sefer 2015 senesi, dekabr ayında ayırılğan edi. 2016 senesine belgilengen para, tahminen 65 yarım milliard ruble, alâ daa ayırılmadı, dep aytıla mektüpte.

Kirilenkonıñ qayd etkenine köre, şirket planlaştırılğan müddet içinde köpür qurıp olamağanı ve paalı qurucılıq aletleriniñ satın alınmasına yatırım etip olamağanınıñ sebebi, yapılğan iş içün paranıñ keçiktirilmesi oldı.

«Obyekt qurucılığında vaziyet pek kerginleşti», – dep neşir «Stroygazmontaj» yolbaşçısınıñ sözlerini bildire.

Rusiye Naqliye nazirliginde Kirilenkonıñ mektübini mayıs 30-da alğanlarını ve işke teslim etkenlerini bildirdiler.

Keriç köprü işğal etilgen Qırımnı qomşu Kuban ile bağlamaq kerektir. Köpürde test rejiminde areketni 2018 senesi dekabr ayında açmağa planlaştıralar, obyektniñ tolusınen teslim etilmesi 2019 senesi iyün ayına planlaştırılğan. Köpür qurulmasına Rusiye bücetinden 228-den ziyade milliard ruble ayırılması közde tutula.

Keriç boğazında köpür qurmaq kerekligi aqqında Putin Qırım işğalinden soñ, 2014 senesi mart ayında ilân etti. 2015 senesi yanvar 30-da baş nazir Dmitriy Medvedev köpür quruvı boyunca baş yapıcısı olaraq «Stroygazmontaj» şirketiniñ belgilenmesi aqqında emirni imzaladı.

Ukrain tarafı Rusiyenen köpür quruvı aqqında añlaşmadan 2014 senesi, Qırım Rusiye Federatsiyası tarafndan işğal etilgen soñ çıqtı.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG