Aqyardan bir ekolog Margarita Litvinenko Aqyar kanalizatsiyasınıñ 70 fayızı temizlenmeyip, deñizge tökülgenini ayta. Onıñ sözlerine köre, ta sovet vaqtında işke tüşürilgen «Yujnıy» temizlev aletleri kompleksi kanallarnı keyfiyetli temizlep olamay, bunıñ içün Aqyar yalısında deñizde yuvunması havflıdır.
Bu aqta ekolog Qırım.Aqiqat Radiosınıñ saba yayınında bildirdi.
«Deñizge şartlı olaraq temizlengen kanalizatsiya suvları töküle, olar esas effektiv suv temizleme seviyelerden keçmey. Bu fizikiy ve himik dezinfektsiyalar, yani dezinfektsiyadan keçmegen suvlar deñizge töküle. Anda tek mehanikiy temizlev bar, işte bütün bu suvlar rusiyeliler, ukrainler zeerlenmek içün kelgen yerge, yani deñizimizge töküle, Balıqlavada ise, temizlev bile keçirilmey», – dedi Litvinenko.
Ekolog Aqyarda deñizde yuvunmaq içün havfsız yerni aytıp olamadı, ve «şeer yalısında ter-temiz yer yoq», dep añlattı. O eñ kirli yerlerni qayd etti:
«Bu bizim Karantinnaya körfezimiz, Balıqlava, çünki Ceneviz qalesinden tüşken bütün bu kanalizatsiya suvları, tabiat yaratılğanı kibi, tamam bu turistler ve yerli sakinler sevgen «Altın» («Zolotoy»), «Kümüş» («Serebrânıy») yalılarına kete. Bu eñ kirli yerler, ve şeer merkezi, elbet», – dep belley Litvinenko.
Bundan evel Aqyar deputatları temizlev sistemaları eskirgeni sebebinden yalılarnıñ sanitar vaziyeti yaramay olğanı aqqında ilân etken edi.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
