Link açıqlığı

Smedlâyev: Qırımda mahkeme «Hizb ut-Tahrir» işi» boyunca dört qabaatlanğan kişiniñ apiste bulunma müddetini sentâbr 8-ge qadar uzattırdı


Aqmescitte Moskvağa boysunğan rayon mahkemesi 2016 senesi fevral ayında yaqalanğan, «Hizb ut-Tahrir» işi» boyunca dört qabaatlanğan kişiniñ – Emir-Usein Kuku, Vadim Siruk, Enver Bekirov ve Muslim Aliyevniñ apiste bulunma müddetini üç ayğa uzattırdı. Bu aqta Qırımtatar Qurultayınıñ Merkeziy saylav komissiyasınıñ reisi Zair Smedlâyev bildirdi.

«Mahkeme qabaatlağan tarafını tuttı, imayeniñ bütün delilleri ise, ğaliba, yaqalanğanlarnıñ soy-sopları ve toplaşuv zalınıñ divarları içün seslendirildi. Apiste bulunma müddetiniñ sentâbr 8-ge qadar uzattırılmasınıñ tek bir sebebi bar, o da, azatlıqta olıp, olar episi taqiqattan qaça bile, şaatlarğa basım yapa bile, sağlıq tarafından ise, olarnıñ iç birinde apiste bulunmaq içün zıddiyeti yoqtır, eken», – dep yazdı Smedlâyev Facebook saifesinde.

«Aslında, eñ inandırıcı soñki delil oldı: sen sağlam olsañ, apiste buluna bilesiñ, belki de, bulunmaq mecbursıñ!» – dep qoştı Smedlâyev.

İyül 7-de Aqmescitteki Kiyev rayon mahkemesinde bu dava boyunca er qabaatlanğan kişi boyunca dört toplaşuv keçirildi. Toplaşuvlar aman-aman saat 22.00-ge qadar devam etti.

Fevral 11-12 künleri Rusiye uquq qoruyıcıları Qırımda islâm dinini kütkenlerniñ evlerinde bir sıra tintüv keçirip, insanlarnı yaqaladılar. Umumen 14 insan yaqalandı, olardan dörtü apiske alındı.

«Hizb ut-Tahrir» – halqara islâm siyasiy firqasıdır. Onıñ resmiy maqsadı islâm devletini ve musulman yaşayış tarzını qurmaqtır. Bu teşkilât Rusiye, Qazahistan ve Almaniyada yasaq etildi; Ukraina ve diger memleketlerde onıñ faaliyeti qanun boyunca keçirile bile.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG