İyün 7-de Rusiyege boysunğan Sudaq şeer mahkemesi mayıs 18-de sürgünlik qurbanlarınıñ hatırasına bağışlanğan aktsiyasına ketken dört qırımtatarğa qarşı açılğan cinaiy işni qapattı. Bu aqta adliyeci Cemil Temişev bildirdi.
«Er dört «Sudaq» protokolı boyunca müsbet qarar alındı))) bu dava boyunca iş qapatıldı» – dep yazdı Temişev Facebook saifesinde.
Qırımtatar Milliy Meclisiniñ reis muavini İlmi Umerov mahkeme qararına böyle izaat berdi: «Qırımdaki vaziyetke köre, buna inanması ağırdır... Amma bu kerçektir».
Bundan evel, salı künü mahkeme qabaatlanğanlarnıñ biri olğan Alim Muslâdinovğa qarşı cinaiy işni qapattı. Bundan soñ adliyeci Konstantin Rustemov qalğan avto yürüş iştirakçileri boyunca qarar aynı olacağını tahmin etti.
Yaqalanğanlar, teşkil etüv boyunca belgilengen tertipni bozuv ya da toplaşuv, miting, numayış, yürüş ya da piket keçirüvinde (Rusiye KOAP 20.2 maddesi) qabaatlandı. Bu madde boyunca qabaatlanğanlar 10 biñden 20 biñge qadar ruble para cezasınen ya da qırq saatqa qadar iş cezasınen cezalana bile.
Bu iş boyunca ilk mahkeme toplaşuvı keçirilmesi mayıs 25-ke belgilengen edi. Sudaqta yaqalanğanlarğa destek köstermek içün 100-ge yaqın insan keldi.
Bundan evel Qırımda rusiyeli uquq qoruyıcılar mayıs 18-de hatıra merasimine ketken avtomobil aydavcılarını kütleviy şekilde toqtatqanı aqqında malümat peyda olğan.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
