Ukrainanıñ qırımtatar yırcısı Jamala ELLE mecmuasına bergen intervyusında onıñ «Eurovision-2016» yarışında taqdim etken «1944» yırı ne içün Rusiyede «Rusiyege qarşı» olaraq qabul etilgenini añlattı. Jamalanıñ fikrince, Rusiye sakinleri tarihiy vaqialarnı Qırımdaki bugünki vaziyetinen qıyaslağanlar.
«Bellesem, bu «hırsıznıñ qalpağı da yana» degen kibidir. Sürgünlik tarihı olarnıñ aqıllarında Qırım işğalinen ve bugünki künde qırımtatarlarğa qarşı yapılğan zulumnen bağlı assotsiatsiyalarnı peyda etti, amma türküde bu aqta bir söz bile yoq... «1944» bu menim şahsiy ikâyem», – dep añlattı Jamala.
Onıñ qayd etkenine köre, Avropa bu yırnı «doğru» qabul etti ve bunıñ delili rey berüvniñ neticesi oldı.
Jamala yarışta Rusiyeni temsil etken Sergey Lazarev ile bir-birine destek köstergenlerini da hatırladı.
«Biz quçaqlaştıq ve bir-birimizge muvafaqiyet tiledik. Ve men Sergeyge provokatsiyalarğa diqqat etmemege rica ettim, çünki oña da, maña kibi, basım yapqanlar», – dep hatırlay Jamala yarış finalından evelki sana arqasındaki körüşüvni.
Ukraina temsilcisi, Qırım yırcısı Jamala «Eurovision-2016» yarışında ğalebe qazandı, onıñ finalı İsveçiya paytahtı Stokgolm şeerinde mayıs 15-ke keçer gecesi keçirildi. Konkurs qaidelerine binaen, endi kelecek sene Ukraina «Eurovision» yarışını öz devletinde qabul ete bile, amma onıñ bunı red etmege de aqqı bar.
Ukraina «Eurovision» yır yarışında 2003 senesinden başlap iştirak ete. 2004 senesi Ukraina temsilcisi Ruslana «Wild Dances» yırınen ğalebe qazandı.
Ukraina konkursnıñ rekordçı devletlerinden biri ola, çünki yahşı neticelerni köstere. 2015 senesi devlet Ukrainanıñ Birinci milliy kanalınıñ arizasınen ilk sefer yarışta iştirak etmekten vazgeçti, bunıñ sebebi devlette kerginleşken maliye ve siyaset vaziyeti oldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
