İyün 7-de Rusiyege boysunğan Sudaq şeer mahkemesinde mayıs 18-de, Sürgünlik qurbanlarını añma künü yaqalanğan dört kişiden biri olğan Alim Muslâdinovnıñ işi boyunca mahkeme toplaşuvı keçirildi. Bu aqta Qırımtatar Milliy Meclisi reisiniñ birinci muavini Nariman Celâl bildirdi, o Facebook saifesinde adliyeci Konstantin Rustemovnıñ beyanatını paylaştı.
Adliyeciniñ qayd etkenine köre, Alim Muslâdinovğa qarşı cinaiy iş qapatıldı.
«Bütün dört cinaiy iş aynı böyle neticelernen yekünlenecektir. Uquq saasında çoq bilmegenler içün, mahkeme Muslâdinovnıñ areketlerinde iç qanun bozuvları belgilemegeni aqqında qarar alındı. Prokuraturanıñ, elbet, şikâyet arizasını bermek aqqı bar. Baqarıq, bu aqqnı qullanacaqlarmı, yoqmı, şimdilik belli degildir», – dep ayttı Konstantin Rustemov.
Qırım.Aqiqatqa mahkeme toplaşuvı iştirakçilerinden biri bildirgen malümatına köre, kün devamında mahkemede mayıs 18-de diger yaqalanğanlarnıñ işleri de baqılacaq. Mahkeme toplaşuvı saat 11.00-ge belgilengen edi, amma keççe başlandı.
Yaqalanğanlar, teşkil etüv boyunca belgilengen tertipni bozuv ya da toplaşuv, miting, numayış, yürüş ya da piket keçirüvinde (Rusiye KOAP 20.2 maddesi) qabaatlandı. Bu madde boyunca qabaatlanğanlar 10 biñden 20 biñge qadar ruble para cezasınen ya da qırq saatqa qadar iş cezasınen cezalana bile.
Bu iş boyunca ilk mahkeme toplaşuvı keçirilmesi mayıs 25-ke belgilengen edi. Sudaqta yaqalanğanlarğa destek köstermek içün 100-ge yaqın insan keldi.
Bundan evel Qırımda rusiyeli uquq qoruyıcılar mayıs 18-de hatıra merasimine ketken avtomobil aydavcılarını kütleviy şekilde toqtatqanı aqqında malümat peyda olğan.
Qırım Rusiye tarafından işğal etilgen soñ yarımadada qırımtatarlarnıñ evlerinde, camilerde tintüvler keçirilip başladı, adamlar diniy mensüpligine köre taqip etile, dep qayd ete Meclis temsilcileri ve uquq qoruyıcılar.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
